काठमाडौं, १५ असार । कोरोना भाईरस (कोभिड १९) को नक्कली औषधि बनाएको आरोपमा बाबा रामदेव र आचार्य बालकृष्णविरुद्ध एफआईआर दर्ता गरिएको छ ।

कोभिड १९ को नक्कली आयुर्वेदिक औषधि बेच्ने षडयन्त्र गरेको आरोपमा योग गुरु बाबा रामदेव र आचार्य बालकृष्णसहित पाँच जनाविरुद्ध भारतीय प्रहरीले पहिलो सूचना रिपोर्ट ( एफआईआर )दर्ता गरेको हो । अब प्रहरीले उनीहरुविरुद्ध अनुसन्धान अगाडि बढाउने छ ।

प्रहरीले रामदेव र आचार्य बालकृष्णसहित अनुराग बस्र्नी, बलवीर सिंह तोमार र अनुराग सिंह तोमारविरुद्ध पनि एफआईआर दर्ता गरिएको छ । आचार्य बालकृष्ण रामदेवले प्रवद्र्धन गरेको पतञ्जली आयुर्वेद लिमिटेडका प्रमुख कार्यकारी अधिकृत हुन् । त्यस्तै अनुराग बस्र्नी नेशनल इन्स्टिच्युट अफ मेडिकल साइन्स एन्ड रिसर्च (निम्स) का अध्यक्ष र अरु दुई निर्देशक हुन् ।

रामदेव र उनको समूहले केन्द्रिय आयुर्वेदिक मन्त्रालयको स्वीकृतिबिना नै उक्त औषधि बेचेको एफआईआरमा दाबी गरिएको छ । पतञ्जली आयुर्वेदले पाँच दिनअघि कोरोनिल नाम दिइएको आयुर्वेद औषधि सार्वजनिक गर्दै कोभिड-१९ निको हुने दाबी गरेको थियो ।

यो औषधि जयपुर नजिकको निजी संस्था निम्सको सहयोगमा कोरोनाभाइरस संक्रमित बिरामीहरुमा ‘क्लिनिकल ट्रायल’ गरिएको दाबी गरिएको थियो ।

वकिल बलवीर जाखड लगायत केही व्यक्तिले गरेको गुनासोका आधारमा शनिबार जयपुरको ज्योति नगर पुलिस स्टेशनमा एफआईआर दर्ता भएको थियो । त्यहाँका प्रहरी अधिकारी अशोक गुप्ताका अनुसार धेरै गुनासो रामदेवले बिनाआधार औषधि विकास गरेको दाबी गरेको धेरै गुनासा थिए । अहिलेसम्म कसैलाई पक्राउ भने गरिएको छैन ।