काठमाडौं २२ असार । दोस्रो चरणअन्तर्गत भएको निर्वाचनमा हालसम्म ३२१ स्थानीय तहको मतपरिणाम घोषणा भएको छ। एबीसी एक्जिट पोललाई यस अघि नै नेका र माओवादीले पूरा गरेका थिए भने एमालेले झापाको शिवसताक्षी नपा प्रमुख जितेर १४३ स्थानमा आफ्नो झण्डा फहराएको छ । एमालेका चन्द्रकुमार शेर्मा लिम्बु १४६८४ मत प्राप्त गरी बिजयी भएका छन् ।

उपमेयरमा पनि एमालेकै भोजकुमारी नेपाल १४९६० मतका साथ बिजयी भएकी छन् ।

मेयरमा कांग्रेसका निकटतम प्रतिद्वन्द्वी परशुराम ढुंगानाको ९८५६ मत छ भने उपमेयरमा कांग्रेसकी जयकुमारी चेम्जोङको ९३२४ मत प्राप्त भएको छ ।

झापाका १५ स्थानीय तहमध्ये अब मेची,दमक,अर्जुनधारा नगरपालिका र बुद्धशान्ति गाउँपालिकाको मत परिणाम आउन बाँकी छ ।

अहिलेसम्म एमालेले झपाका बिर्तामोड,भद्रपुर,कनकाइ र शिवसताक्षी नगरपालिका तथा कमल गाउँपालिका जितेर अग्रता लिएको छ । कांग्रेस र राप्रपाले बराबरी ३ । ३ स्थानीय तह जितेका छन् ।

निर्वाचन आयोगका अनुसार हालसम्म २८ जिल्लाका सबै स्थानीय तहको मतगणना कार्य पूरा भएको छ। अहिले ६ जिल्लाका १३ स्थानीय तहमा मतगणना जारी रहेको छ।

झापाका ३ स्थानीय तह, मोरङका २, सुनसरी दुई, उदयपुर दुई, रुपन्देही १, कञ्चनपुर दुई र कैलालीको एक स्थानीय तहमा मतगणना कार्य जारी रहेको छ। पछिल्लो समय कुनै पनि स्थानीय तहको मतगणना कार्य स्थगित नरहेको आयोगले जनाएको छ।

अहिलेसम्मको मतगणनाअनुसार नेकपा एमाले १४३, नेपाली कांग्रेस ११८, नेकपा माओवादी केन्द्रले ३८ संघीय समाजवादी फोरम ७, नेपाल लोकतान्त्रिक फोरम ६, राप्रपा चार, राष्ट्रिय जनमोर्चा दुई र स्वतन्त्र उम्मेदवार दुई स्थानमा स्थानीय तहको प्रमुख ।अध्यक्ष पदमा निर्वाचित भएको आयोगले जनाएको छ।

दोस्रो चरणमा ३३४ स्थानीय तहबाट १५ हजार ३८ जनप्रतिनिधि चयन हुनेछन्। यस निर्वाचनमा ४७ लाख ४० हजार ५२२ मत खसेको थियो।