काठमाडौं,२२ चैत । नेत्रबिक्रम चन्द विप्लव नेतृत्वको नेपाल कम्युनिष्ट पार्टीले कोरोना भाइरसको महामारीसँग जुध्न सरकारलाई १६ बुँदे सुझाव दिएको छ । आज एक विज्ञप्ती जारी गर्दै सरकारलाई सुझाव दिएको हो ।

सुझावमा कोरोना संक्रमणको आशंका लागेकालाई उपचार गर्न नमान्ने निजी अस्पताललाई कारबाही गरिने तथा कोरोना भाइरसबाट बच्ने उपायका बारेमा सबै नागरिकलाई स्पष्ट जानकारी गराउने गरी प्रचारप्रसारका काम गर्नुपर्ने, लकडाउनका बेला गाँस र बासको समस्या भएको नागरिकलाई दैनिक खानपानको व्यवस्था गर्नुपर्ने उल्लेख गरेको छ।

आज शनिबार महासचिव विप्लवद्वारा जारी विज्ञप्तिमा विदेशमा फर्किन चाहने सबै नागरिकलाई फर्काउने व्यवस्था गर्नुपर्ने र अन्तर्राष्ट्रिय उडानबाट आएका सबै नागरिकलाई विश्व स्वास्थ्य संगठनको मापदण्डअनुसार क्‍वारेन्टाइनमा राख्न सरकारलाई सुझाव दिइएको छ। त्यस्तै सो पार्टीले स्वास्थ्यकर्मीहरूका लागि पर्याप्त पिपिईको व्यवस्था, देशभित्रै औषधी उत्पादन गर्ने उद्योगहरूलाई प्रोत्साहन गर्ने लगायतका कार्य गर्न सरकारलाई सुझाव दिएको छ। मेडिकल सामग्री खरिदका क्रममा अनियमितता गर्ने वा भ्रष्टाचार गर्नेलाई कानुनी कारबाही गर्न पनि विप्लव नेतृत्वको नेकपाले सुझाव दिएको छ।