बुटवल, १८ चैत्र । कोरोना भाइरस [कोभिड –१९] को नियन्त्रण तथा उपचारको लागि चिन सरकारले नेपाललाई उपलब्ध गराएको सामाग्री प्रदेशको राजधानी बुटवल पुगेको छ । प्रदेशका स्वास्थ्य संस्थाहरुका लागि बुटवल पुगेका विभिन्न स्वास्थ्य सामग्री प्रदेश ५ सरकारले प्रदेशका विभिन्न अस्पतालहरुलाई बितरण गर्ने भएको छ । मंगलबार बसेको कोरोना भाइरस नियन्त्रण तथा उपचारका लागि समन्वय तथा सहजीकरण समितिको बैठकले समानुपातीक तरीकाले सामाग्रीहरु बितरण गर्ने निर्णय गरेको हो ।
बैठकले प्रदेश स्वास्थ्य आपूर्ति व्यवस्थापन केन्द्रमार्फत प्रदेशमा स्थापना गरिएको ४ वटा आईसोलेसन अस्पताल, १२ वटा जिल्ला अस्पताल, १२ जिल्लाका स्वास्थ्य कार्यालय तथा एम्बुलेन्स चालकहरुको लागि ग्लोम्भस, मास्क, पिपिई, सेनिटाईजर, गगल्स लगायतका सामाग्री वितरण गर्ने निर्णय गरेको मुख्यमन्त्रीका प्रेस संयोजक शेर बहादुर केसीले जानकारी दिनुभएको छ ।
चिन सरकारले उपलब्ध गराएका र प्रदेश सरकारले आफै खरिद गरेका २५ हजार मास्क, ग्लोभ्स २० हजार, एन ९५ मास्क ४ सय, आईआर थर्मोमिटर १० थान, सेनिटाईजर १० लिटर, गगल्स ५० थान, पिपिई १ हजार थान, गाउन, क्याप, ग्लोभ्स र सुज कभर २ सय सेट रहेका छन् ।