बुटवल, १६ चैत्र । प्रदेश नम्बर ५ मा शनिबार सांझ सम्म ३६ जनाको स्वाब परीक्षणका लागि पठाइएकामा २३ जनाको रिपोर्ट नेगेटिभ आएको छ । प्रदेशमा हाल सम्म ६१ जनाको स्वास्थ्य परीक्षण गरिएको प्रदेश सरकार सामाजिक विकास मन्त्रालय महाशाखा प्रमुख डा उमाशंकर चौधरीले जानकारी दिनुभयो । चौधरीका अनुसार रिपोर्ट नेगेटिभ देखिएपछि उनीहरुलाई घर पठाइएको छ भने अन्य १३ जनालाई विभिन्न अस्पतालका आइसोलेशनमा राखिएको छ । १३ जनाको रिपोर्ट आउन बाँकी रहेको चौधरीले बताउनु भयो ।

कोभिड १९ को संक्रमण नियन्त्रणका लागि लकडाउन भएपछि हवाइसेवा बन्द हुँदा बिरामीको स्वाब जाँचका लागि गाडीबाट काठमाडौँ पठाउनुपर्ने भएकाले केही ढिलाइ भएको समेत उहांले जानकारी दिनुभयो ।
प्रदेशअन्तर्गत दाङबाट ५ जनाको स्वाब नमूना पठाइएकामा सबै रिपोर्ट नेगेटिभ देखिएको निर्देशनालयले जनाएको छ । बाँकेबाट २३ जनाको नमूना पठाइएकामा सात जनाको नेगेटिभ रिपोर्ट देखिएको र अन्य १६ जनाको रिपोर्ट परिक्षणको प्रक्रियामा रहेको स्वास्थ्य कार्यालय बांकेका कारोना फोकल पर्सन नरेश श्रेष्ठले बताउनु भयो ।
प्रदेश सरकारले प्रदेशका चार सरकारी अस्पतालमा आइसोलेशन वार्ड खोल्ने निर्णयसंगै सरकारले बुटवलस्थित लुम्बिनी प्रादेशिक अस्पताल, भैरहवास्थित भीम अस्पताल, दाङको बेलझुण्डीस्थित केन्द्रीय आर्युवेद विद्यापीठ र बाँकेको खजुराको सुशील कोइराला प्रखर क्यान्सर अस्पताल आइसोलेशन वार्डका रुपमा सञ्चालनमा आइसकेका छन् । मन्त्रालयका महाशाखा प्रमुख चौधरीका अनुसार बुटवलको धागो कारखानामा निर्माण गरिएको आइसोलेशन अस्पतालमा ५० शय्या, भीम अस्पतालमा ३० शय्या, दाङको बेलझुण्डीस्थित आयुर्वेद विद्यापीठमा ३० शय्या र बाँकेको सुशील कोइराला अस्पतालमा ३० शय्याको आइसोलेशन वार्ड निर्माण गरी सेवा सञ्चालन गरिएका छन् ।
प्रदेशका १२ जिल्लामा व्यवस्था गरिएका क्वारेन्टाइनमा अहिलेसम्म १५३ जनालाई राखिएको र उनीहरुलाई दुई हप्तासम्म क्वारेन्टाइनमै राखेर स्वास्थ्य अवस्था रेखदेख गरिने चौधरीले बताउनु भयो ।