काठमाडौं,१२ फागुन । नेपाल कम्युनिष्ट पार्टी (नेकपा)का नेता झलनाथ खनालले पार्टी एकीकरणको निर्णय सामुहिक निर्णयले हुनुपर्ने बताएका छन ।

आइतबार सुनसरीको धरानमा पार्टी अगुवा कार्यकर्ता भेलामा नेता खनालले पार्टी एकता एक दुई जनाको निर्णयको आधारमा नभई सामुहिक निर्णयले हुनुपर्ने बताएका हुन ।

खनालले पार्टी एकता गर्न गठित कार्यदल भंग भएपछि त्यसको जिम्मेवारी सचिवालयमा आएकाले सामुहिकरुपमा निर्णय गरेर अघि बढ्नुपर्ने धारणा राखे ।

यसअघि विघटन र एकीकरण गर्दा केही नेताहरु मात्र बसेर गरेको भन्दै नेता खनालले त्यही निर्णयले अहिले समस्या सिर्जना गरेको दाबी गरे । नेता खनालले कम्युनिष्ट पार्टीको नेतृत्वविना समाजवाद आउने परिकल्पना गर्न नसकिने भन्दै एकीकरणको नाममा पार्टी विघटन गर्ने र तल्लो तहसम्म एकीकरणमा विलम्ब भइरहेको प्रति असन्तुष्टी व्यक्त गरेका छन ।