काठमाडौँ, १२  माघ ।  अमेरिकी राष्ट्रपति डोनाल्ड ट्रम्प बजेट अभावमा ठप्प रहेका संघीय सरकारका आंशिक कार्यालयको काम सुचारु गर्न सहमत भएका छन् ।

राजनीतिक दबाब बढ्दै गएपछि राष्ट्रपति ट्रम्प ३५ दिनदेखि बन्द आंशिक सरकारी कार्यालयको कार्य सञ्चालनका लागि आवश्यक पर्ने बजेट दिन सहमत भएका हुन् ।

राष्ट्रपति ट्रम्पले तीन हप्ताका लागि कार्य सञ्चालन बजेट पारित गर्न सहमत भएका हुन् । तर यसमा उनले अडान लिएको जस्तो मेक्सिकोसँगको सीमामा बनाउने भनिएको सीमा पर्खालका लागि कुनै बजेट छैन ।

राष्ट्रपति डोनाल्ड ट्रम्पले मेक्सिकोसँगको सीमा क्षेत्रमा बनाउने भनेको सीमा पर्खालका लागि सरकारी कोषबाट बजेटको व्यवस्था हुनु पर्ने तथा विपक्षीको त्यस विरोधी अडानका कारण समस्या उत्पन्न भएको हो ।

अमेरिकी इतिहासमै सबैभन्दा लामो अवधि सरकारी कामकाज ठप्प भएको यो घटनालाई सहजिकरण गर्न राष्ट्रपति ट्रम्पले तीन हप्ताका लागि बजेट दिने बताएका हुन् ।

ट्रम्पले चुनावी अभियानदेखि नै अमेरिका गैरकानुनी रुपमा प्रवेश गर्नेहरुलाई रोक्नका लागि मेक्सिकोसँगको सीमा क्षेत्रमा पर्खाल बनाउनु पर्ने बताउँदै आएका छन् । ट्रम्प यसका लागि सरकारी कोषबाट ५।७ बिलियन डलर चाहन्छन्, जुन कुरा डेमोक्र्याटिक पार्टीले अस्वीकार गर्दै आएको छ ।

शुक्रबार सिनेट र हाउस अफ रिप्रिजेनटेटिभले तीन हप्ताका लागि संघीय सरकार कार्यालयलाई कार्य सञ्चालनका लागि दिइने बजेट सम्बन्धी विधेयक सर्वसम्मत रुपमा पारित गरेको छ ।

योसँगै ३५ दिनदेखि रोखिएको काम सुरु भएको छ तर अनिश्चितता भने सकिएको छैन । तीन हप्तापछि के गर्ने भन्नेबारे छलफलको खाँचो छ । यो अवधिमा समस्याको स्थायी समाधान नखोजिएमा फेरि काम ठप्प हुनेछ ।

राष्ट्रपति ट्रम्पले ह्याइट हाउसको रोज गार्डेनमा भने, ‘संघीय सरकारी कार्यालयका लागि आउँदो फेब्रुअरी १५ सम्मका लागि बजेट प्रदान गर्ने सहमतिको घोषणा गर्न पाउँदा निकै गर्व महसुस गरेको छु ।’