चितवन, १५ असोज । । चितवनको भरतपुर महानगरपालिका वडा नं २७ पर्साढापमा थारु कल्याणकारिणी सभाले धुमधामले जितिया उत्सव मनाइएको छ । थारु समुदायको महत्वपूर्ण चाड जितियाको अवसरमा चितवनका थारु समुदायले उत्सव नै मनाएका हुन् ।

कृषि राज्यमन्त्री रामकुमारी चौधरीले भरतपुर महानगरस्तरीय जितिया उत्सवको उद्घाटन गर्नुभएको थियो । उत्सवको उद्घाटन गर्दै राज्यमन्त्री थारुहरुलाई विगतमा राज्य र समाजबाट हेपिएको बताउँदै अब ती दिनको अन्त्य भएको बताउनु भएको छ ।

चितवन त्यसमा पनि भरतपुर थारू समुदायको संस्कृति र भेषभुषामा अत्यन्तै धनी रहेको बताउँदै उहाँले यसको संरक्षण र विकासमा लाग्न सम्पूर्ण थारू समुदायलाई आग्रह गर्नुभयो । थारू समुदायमा जितिया पर्वको साँस्कृतिक महत्व रहेको बताउँदै मन्त्री चौधरीले सम्पूर्णलाई जितिया पर्वको अवसरमा शुभकामना व्यक्त गर्नुभयो । उहाँले सरकार ‘सुखी नेपाली समृद्ध नेपाल’ भन्ने नारालाई सार्थक पार्न योजनाबद्ध ढंगले अगाडि बढिरहेको बताउनुभयो ।

उहाँले निर्मला पन्तदेखि अन्य आपराधिक घटनामा संलग्नहरू छिट्टै कारवाहीको दायरामा आउने बताउनुभयो । शान्ति सुरक्षा अमनचयन कायम राख्नु सरकारको प्रमुख दायित्व रहेको बताउँदै उहाँले यसमा समाजको दायित्व पनि उत्तिकै रहने बताउनुभयो ।

कार्यक्रममा भरतपुर महानगरपालिका प्रमुख रेनु दाहालले थारु समुदायका महिलाहरुको महान जितिया पर्व साँस्कृतिक संरक्षणमा महत्वपूर्ण हुने भन्दै जितिया पर्वको अवसरमा सम्पूर्णलाई शुभकामना व्यक्त गर्नुभयो । उहाँले प्रचलित धर्म, सँस्कृतिको रक्षा, जगेर्ना र प्रवद्र्धन गर्न यस महोत्सव सार्थक हुने विश्वास गर्नुभयो । यस्ता मेला महोत्सव र पर्वहरु साँस्कृतिक पर्यटन प्रवद्र्धन गर्न महत्वपूर्ण माध्यम हुने र यस्ता साँस्कृतिक मेला पर्वहरुले समाजमा आपसी सद्भाव, भाइचारा र सामाजिक सम्बन्ध कायम राख्न महत्वपूर्ण भूमिका खेल्ने उहाँको भनाइ थियो ।