काठमाडौ,१० असोज । सत्तारुढ नेपाल कम्युनिष्ट पार्टी (नेकपा) का अध्यक्ष पुष्पकमल दाहालले पञ्चायतकालीन ऐन तत्काल संशोधन गर्न सरकारलाई आग्रह गर्नु भएको छ ।

अध्यक्ष दाहालले ऐन, कानुनको उचित व्यवस्थापन नभएकै कारण मुलुकमा अन्तरविरोधि गतिविधि भईरहेकोतर्फ पनि सरकारको गम्भिर ध्यानाकर्षण गराउनु भयो ।

बुधबार नेपाल पर्यटक यातायात व्यवसायी संघको १५ औं वार्षिक साधारणसभालाई काठमाडौंमा उद्घाटन गर्दै उहाँले पूरानै ऐन, कानुनका कारण मुलुकमा अन्तरविरोध बढदै गईरहेको पनि स्मरण गराउनु भयो । अध्यक्ष दाहालले राज्यले व्यवसायीहरुलाई प्रोत्साहन गर्ने नीति लिनुपर्ने आवश्यक्ता पनि औंल्याउनु भयो ।

उहाँले नाफाको सुनिश्चित हुने ग्यारेन्टी राज्यले गर्न सकेमात्रै मुलुकको समृद्धिको यात्रामा व्यवसायीहरुले सक्दो पहल गर्ने पनि स्पष्ट पार्नु भयो ।

अध्यक्ष दाहालले सरकारले व्यवसायीहरुलाई कर असुल्ने माध्यामको रुपमा मात्रै लिन नहुने पनि बताउनु भयो । उहाँले मुलुकलाई समृद्ध बनाउने आधारको रुपमा रहेको पर्यटन क्षेत्रको विकासमा आफूले सक्दो सहयोग गर्ने आश्वासन पनि दिनु भयो ।