काठमाडौँ, ५ असोज । तान्जिनियामा सयौँ मानिस चढेको फेरी भिक्टोरिया तालमा पल्टिँदा ४० जनाको ज्यान गएको छ ।

भिक्टोरिया ताल मा डुंगा पल्टिँदा डुब्नेको संख्या २०० भन्दा बढी रहेको एक सरकारी अधिकारीलाई उद्धृत गर्दै समाचार संस्था रोयटर्सले जनाएको छ ।

स्थानीय समय अनुसार शुक्रबार बिहानसम्मका लागि उद्धारको काम रोकिएको छ । रातको समयमा उद्धारकार्यमा कठिनाई भएकाले रोकिएको हो । उकोरा आइल्याण्ड र बुगोलोरा आइल्याण्ड बिचको समुद्री किनार पुग्न लागेका बेला फेरी घोप्टिएको हो ।

फेरीमा क्षमता भन्दा धेरै यात्रु रहेको र फेरीको एक क्षेत्रमा चाप बढी भएका कारण घोप्टिएको बताइएको छ । फेरीमा ४०० भन्दा धेरै यात्रु रहेको सरकारी अधिकारीले बताएका छन् । १०० जनाको उद्धार गरिएकोमा ३२ जनाको अवस्था गम्भीर रहेको छ ।

तान्जिनियामा यस्तो दुर्घटना धेरै हुने गरेको छ र कारण क्षमता भन्दा बढी यात्रु नै हुने गरेको छ । सन् २०१२ मा इन्डियन ओसनमा फेरी डुब्दा कम्तिमा १४५ जनाको ज्यान गएको थियो । त्यसको एक वर्षअघि यस्तै घटनामा झण्डै २०० जनाको ज्यान गएको थियो ।

सन् १९९६ मा लेक भिक्टोरियामा यस्तै घटनामा ८०० जना भन्दा धेरैको ज्यान गएको थियो । लेक भिक्टोरिया अफ्रिकाका विशाल तालहरु मध्ये एक हो ।