बझाङ,२९ भाद्र । बझाङमा एक बालक  मृत अवस्थामा फेला परेका छन ।
जिल्लाको छबिस पाथीभेरा गाउँपालिका वडा नं. ७ मजखोरीका महेश बोहराका छोरा ९ वर्षीय कुशल बोहरालाई विहिवार मृत अवस्थामा फेला परेको जिल्ला प्रहरी कार्यालय बझाङले जनाएको छ ।

उनको शव हत्या गरी मकै बारीमा फालेको अवस्थामा विहिवार दिउँसो फेला परेको मृतकका काका किशोर बोहराले जानकारी दिएका छन । उनले घटनाबारे थप जानकारी दिदैं भने, ‘ भतिज (कुशल) बुधबार स्कूलबाट फर्किएर घर नजिकै तीज कार्यक्रम हेर्न गएको थियो, उनले आफ्ना बुबासँग स्क्रीन टज भएको मोबाइल मागेर कार्यक्रम हेर्न गएको बताएका छन ।
त्यहि कार्यक्रममा एक जना त्यहि वडाका धोज बोहराका छोरा पारसले कुशलसँग मोबाइल खोसेका थिए । उक्त दृश्य दिउँसो स्थानीयले पनि देखेका थिए । त्यहि मोबाइलका कारण भतिज कुशलको हत्या गरेको हुन सक्ने हामीलाई आशंका गरीएको छ ।’

कुशलको लाश स्थानीय मजखोरी मा.वि नजिकै मकै बारीमा फालिएको अवस्थामा फेला परेको मृतक आफन्तले जानकारी दिएका छन ।
कुशलका आफन्तले स्थानीय धोज बोहराका छोरा पारसले हत्या गरेको आशंका गरेका छन् ।

घटनाको विस्तृत अनुसन्धानका लागि जिल्लाबाट प्रहरीको टोली घटनास्थल पुगिसकेको जिल्ला प्रहरी कार्यालय बझाङका डि,एस,पी प्रविन धितालले जनकारी दिएका छन ।

मृत अवस्थामा फेला परेका कुशल स्थानीय पाथीभेरे लिटिल स्टार बोर्डिङ स्कूलमा यूकेजीमा अध्ययनरत विधार्थी हुन ।