काठमाडौं २३ भदौ । नेपाल कम्युनिष्ट पार्टीका अध्यक्ष तथा पूर्व प्रधानमन्त्री पुष्पकमल दाहाल प्रचण्डले भारतलाई नेपालको आर्थिक विकासमा सघाउन अपिल गरेका छन् ।
तीन दिने भारत भ्रमणका क्रममा प्रचण्डले भारतीय प्रधानमन्त्री नरेन्द्र मोदी, गृहमन्त्री राजनाथसिंह, राष्ट्रिय सुरक्षा सल्लाहाकार अजित डोभल र विदेशमन्त्री सुस्मा स्वराजसंग भेटवार्ता गरेका छन् । ती भेटवार्ता पहिले भारतीय विश्व सम्बन्ध परिषद् (आइसिडब्लुए)ले शुक्रबार अपरान्ह नयाँ दिल्लीमा गरेको कार्यक्रममा अध्यक्ष प्रचण्डले नेपाल भारत सम्बन्धका विविध आयाममा बोलेका थिए । भारतसँग नेपालको सम्बन्ध विशिष्ठ रहेको तर, नयाँ परिप्रेक्ष्यमा परिभाषित गर्नुपर्ने आवश्यकता रहेको प्रचण्डले बताए ।

अन्तरक्रियामा प्रचण्डले इतिहासको स्मरण गर्दै भने – बाह्र वर्षे द्वन्द्व र त्यसपछिका बाह्र वर्षको परिस्थिति विल्कुल फरक परिस्थिति हो  । युद्धलाई शान्तिमा बदल्नु जोखिम र चुनौतीपूर्ण कार्य थियो  । मेरा लागि यो अवसर थियो  । सम्राट् अशोक पछि बौद्धमार्गी भए  । मलाई पनि उनीजस्तै बन्ने अवसर प्राप्त भयो  । मेरा लागि यो दुर्लभ अवसर हो  । मसँग अरू विकल्प पनि थिएन  । मैले हतियार र लडाकु व्यवस्थापनको जोखिम लिएँ, जसका कारण पार्टी फुट्यो, हामी तेस्रो भयौँ  । यसमा मलाई पछुतो छैन  । तर फेरि नेपालको कम्युनिस्ट आन्दोलन नै एकीकृत गरेर देशलाई राजनीतिक स्थिरता र समृद्धिको बाटोमा अघि बढाउने तहमा पुगेका छौं । यसमा मलाई गर्ब छ । ’ प्रचण्डले भदौ २२ गते भारतीय बद्धिजीवीहरुका बीचमा नेपालको विकसित स्थितिका बारेमा यसरी व्याख्या गरेका थिए । वाम तालमेलदेखि पार्टी एकतासम्मको प्रक्रियामा असन्तुष्ट बनेको भारतलाई प्रचण्डले भने ’विकसित र समुन्नत छिमेकी (भारत र चीन) हाम्रो उन्नति र आर्थिक विकासका लागि अवसर हुन् । यो नेपाली जनताको साझा बुझाइ हो  ।
प्रचण्डले भारतसंगको कुटनीतिक सम्बन्ध केवल एकले अर्कालाई प्रयोग गर्ने वा भारतले नेपालको आन्तरिक मामिलमा खेल्ने तहबाट समृद्धिको यात्रामा सघाएर आफ्नो सुरक्षा चासोप्रति ढुक्क हुन समेत सुझाएका छन् ।