काठमाडौं,१३ साउन । वैदेशिक रोजगार सुझाव सुधार कार्यदलले वैदेशिक रोजगार प्रवर्द्धन बोर्डको संरचना तत्काल परिवर्तन गर्न सरकारलाई सुझाव दिएको छ । कार्यदलले सरकारलाई बुझाउन तयार पारेको प्रतिवेदनमा म्यानपावर कम्पनीलाई ‘मर्ज’ गरेर उनीहरुको हाल भएको धरौटी बढाउन सुझाव दिएको हो ।
श्रम, रोजगार तथा सामाजिक सुरक्षा मन्त्रालयले आन्तरिक श्रम बजार र वैदेशिक रोजगारी क्षेत्रका समस्या र वेथिति दु्रत गतिमा समाधान गर्न गत बैशाख वैदेशिक रोजगार सुझाव सुधार कार्यदल गठन गरेको थियो।
पूर्वसचिव पूर्णचन्द्र भट्टराईको संयोजकत्वमा सोम लुईंटेल, सरु जोशीलगायत सदस्य रहेको कार्यदलले आज श्रम मन्त्रालयमा उक्त सुझाव सुधार प्रतिवेदन बुझाउँदै छ । कार्यदलले वैदेशिक रोजगार ऐन २०६४ संशोधन गर्दा वैदेशिक रोजगारीका नाममा भइरहेको मानव ओसारपसारका मुद्धालाई फौजदारी मुद्धा अन्र्तगत रही दोषिलाई कारबाही हुने व्यवस्था गर्नसमेत सुझाव दिएको छ। हाल वैदेशिक रोजगार ऐन २०६४ संशोधनका क्रममा छ।
बोर्डबाट उपलब्ध गराइने क्षतिपूर्ति वापतको रकम श्रमिक र तिनका परिवारका सदस्यलाई सम्बन्धित स्थानीय तहबाट उपलब्ध गराउने गरी संरचना निर्माण गर्न सुझाव दिएको कार्यदलका एक सदस्यले जानकारी दिए।
प्रतिक्रिया दिनुहोस्