काठमाडौं, ८ जेठ ।  नेपाल कम्युनिष्ट पार्टी (नेकपा) ले १५ दिनभित्र विधान बनाउने गरी कार्यदल गठन गरेको छ ।

प्रधानमन्त्रीको सरकारी निवास बालुवाटारमा मंगलबार बसेको नेकपाको संसदीय दलको बैठकले दुई पार्टी एक भएको अवस्थामा १५ दिन भित्र परिमार्जित विधान बनाउने गरी कार्यदल गठन गर्ने निर्णय गरेको हो । कार्यदलमा भीम रावल, देव गुरुङ, खगराज अधिकारी, कृष्णभक्त पोख्रेल, रेखा शर्मा र रामनारायण बिडारी सदस्य छन् । बैठकले सबै सांसदहरुलाई सरकारका नीति तथा कार्यक्रमको पक्षमा उभिन निर्देशन पनि दिएको छ ।

विधान बनेपछि त्यसै विधानका आधारमा पदाधिकारी नियुक्त गरिने छ । पार्टी अध्यक्ष पुष्पकमल दाहालले विकास निर्माणमा प्रत्यक्ष र परोक्ष रुपमा योग्यताको प्रदर्शन र अनुगमनमा सक्रिय रहन सांसदहरुलाई निर्देशन दिनुभयो ।

त्यसैगरी संसदीय दलका नेता प्रधानमन्त्री केपी ओलीले नीति तथा कार्यक्रममा आएका विषयको जिम्मा आफूले लिने भन्दै त्यसको समर्थन र प्रतिपक्षीको कुरा सुनेर त्यसको सम्बोधन गर्दै संसदमा प्रभावकारी भूमिका खेल्न सांसदहरुलाई निर्देशन दिनुभयो ।

पार्टी एकीकरणपछि मंगलबार संसदीय दलको दोश्रो बैठक बसेको हो । बुधबार संघीय संसदमा सरकारको नीति तथा कार्यक्रममाथि छलफल हुँदैछ ।