काठमाडौं, ७ जेठ । त्रिभुवन विमानस्थलबाट भएको साढे ३३ किलो सुन तस्करी र सनम हत्या प्रकरणका मुख्य नाइके मानिएका चुडामणि उप्रेती गोरेको नेपालका कुनै पनि बैंकमा खाता नभएको तथ्य खुलेको छ ।

सोही प्रकरणबारे छानबिन गर्न बनेको मन्त्रीपरिषद्को उच्चस्तरीय समितिको अनुसन्धानले ‘गोरे’को कुनै बैंकमा खाता नभेटेपछि बैंकिङ कारोबार नगरी ‘गोरे’ले करोडौं रकम चलाएको पुष्टी भएको हो।

काठमाडौं, झापालगायत ठाउँमा सुनको कारोबार गर्न कार्यालय खोलेका, कारोबार हेर्न लेखापाल नै राखेका र पैसा गन्न मेसिनसमेत राखेका ‘गोरे’को बैंकमा खाता नभेटिएपछि समिति सदस्य नै आश्चर्यमा परेका छन्।

तस्करीको पैसा घरघडेरीमा करोडौ लगानी गरेका गोरेले बैंक खाता बिनै कसरी कारोबार गरे?
स्रोत भन्छ, ‘गोरेले अन्तर्राष्ट्रिय डलर कार्ड खाता प्रयोग गरेको हुन सक्छ।’

स्रोतका अनुसार ‘गोरे’ले केही समयअघि मात्र काठमाडौंको गौरीघाटमा एक भव्य बंगला बनाएका थिए।

बंगलाभित्र बियर बारदेखि रिमोट कन्ट्रोलबाट खुल्ने ढोका जडान गरिएको थियो। सो घर केही समयअघि उनले ५ करोडमा एक जग्गा कारोबारीलाई बेचेका थिए। नजिकै ‘गोरे’को अर्को घर पनि छ।

‘गोरे’ले सोह्रखुट्टे क्षेत्रमा १७ आना जग्गा बुवाका नाममा किनेको फेला परेको छ। प्रतिआना ४२ लाखका दरले किनिएको सो जग्गा समितिले रोक्का गरेको छ।

‘गोरे’ले पूर्वका विभिन्न स्थानमा पनि जग्गामा लगानी गरेको भेटिएको छ।

‘गोरे’ले सहयोगी माधव घिमिरेका नाममा मोरङको मेक्लाजुङमा १ करोड ७६ लाखमा २६ कट्ठा जग्गा किनेको समितिको अनुसन्धानमा देखिएको छ।

श्रीमती, सासू र अन्य आफन्तका नाममा ‘गोरे’ले केही सम्पत्ति जोडेको खुलेको छ।

उप्रेतिको नाममा कुनै बैंक खाता र सम्पत्ति नभेटिएपछि समितिले उनका नातेदार र सहयोगीको सम्पत्ति खोजी र लगानीमा केन्द्रित भएर अनुसन्धान अघि बढाएको छ।