काठमाडौं, २ जेठ । संघिय संसदको बुधबार बसेको प्रतिनिधिसभाको बैठकमा प्रदेश नं. २ का मुख्यमन्त्री लालबाबु राउतसंग स्पष्टीकरण सोध्नुपर्ने भन्दै सरकारको ध्यानाकर्षण गरिएको छ।

सत्तारुढ दल एमालेकै सांसदद्धारा मुख्यमन्त्रीसंग स्पष्टीकरण सोध्न माग गरिएको हो । एमाले सांसद निरु पालले नेपालको झण्डा बिगार्ने, रंग, आकार थाहा नहुने कर्मचारीलाई मन्त्रीले स्पष्टीकरण सोधेको प्रसंग उल्लेख गर्दै सांसद पालले मुख्यमन्त्रीलाई नै स्पष्टीकरण सोध्न माग गर्नुभयो ।

भारतीय प्रधानन्त्री नरेन्द्र मोदीको नेपाल भ्रमणका बेला नागरिक अभिनन्दनका क्रममा जनकपुरमा आयोजित कार्यक्रममा प्रदेश नम्बर २ का मुख्यमन्त्री लालबाबु राउतले संविधानविरुद्ध संघर्ष गर्नुपरेको भन्ने अभिव्यक्ति दिनुभएको थियो । उँहाको यही अभिव्यक्तिलाई इंकित गर्दै सो स्पटीकरणको माग गरिएको हो ।

प्रतिनिधिसभामा सांसद पालले भन्नुभयो– ‘यस्ता मुख्य मन्त्रीलाई प्रशिक्षण दिने कि नदिने म सरकारको गम्भिर ध्यानाकर्षण गराउँछु ।

राष्ट्रियताको सवालमा पछिल्लो समय प्रधानमन्त्रीका बारेमा विभिन्न टिका–टिप्पणी भइरहेको भन्दै उहाँले तात्कालिन समयमा भएको नाकाबन्दीलाई होइन भन्नु र प्रधानन्त्रीले सम्बन्ध सुधार्नुपर्छ भनेर मित्रराष्ट्र भारतका प्रधानमन्त्रीलाई स्वागत गर्दा लम्पसारवाद भन्नु दुवै अतिवाद हुने टिप्पणी गर्नुभयो ।

काठमाडौं धुलो र धुवाँको शहर बन्दै गएको भन्दै उहाँले पाहुनालाई बोलाएर रातारात पिच गर्नुभन्दा नागरिकका साना, मसिना समस्या सम्बोधनमा सरकारको ध्यानाकर्षण गराउनुभयो । उहाँले दोधारा–चाँदनी सीमामा भारतले पटक–पटक नेपालीलाई दुःख दिने गरेको भन्दै तत्काल रोक्नका लागि पहल गर्न सरकारको ध्यानाकर्षण गराउनुभयो ।