काठमाडौं, ३१ वैशाख । त्रिभुवन विमानस्थलबाट भएको साढे ३३ किलो सुन तस्करी र सनम शाक्य हत्या प्रकरणमा संलग्नताको आरोपमा प्रहरीले थप दुई जनालाई पक्राउ गरेको छ ।

पक्राउ पर्नेमा झापा दमकका विनोद अधिकारी र मोतिराम श्रेष्ठ छन् । प्रहरीले अधिकारीलाई झापाको दमक र श्रेष्ठलाई दोलखाबाट पक्राउ गरेको हो । उनीहरु तस्करीको सुनको पैसा कारोबारमा संलग्न भएको प्रहरीको भनाइ छ ।

पक्राउ गरिएका दु्बैजनालाई जिल्ला प्रहरी कार्यालय मोरङमा ल्याइएको छ । उनीहरुलाई सोमबार नै जिल्ला अदालत मोरङमा म्याद थप गरिएको मोरङका प्रहरी प्रमुख अरुण बिसीले जानकारी दिए ।

दुवै जना मनि ट्रान्सफरका सञ्चालक हुन । मोरङका प्रहरी उपरीक्षक बिसीका अनुसार सुन तस्कारी र सनम हत्याकाण्डमा श्रेष्ठ र अधिकारीलाई यसअघि भने प्रतिवादी बनाइएको थिएन ।

तर सुन तस्करी र सनम हत्या काण्डमा संलग्न ६३ जनामाथि अदालतमा मुद्धा चलिरहँदा अनुसन्धान समितिले तस्करीबाट भएको रकम खोजी गर्ने क्रममा अधिकारी र श्रेष्ठको पनि संलग्नता देखिएपछि नियन्त्रण्मा लिइएको बिसीले बताए ।