काठमाडौं, ३१ वैशाख । काठमाडौं प्रहरी परिसरले गत माघ ७ गते दरबारमार्गस्थित होटल ल्यान्डमार्कमा भएको भनिएको सामुहिक बलात्कारको केसको अनुसन्धान गरेर प्रतिवेदनसहितको मिसिल सोमबार जिल्ला सरकारी वकिल कार्यालय काठमाडौंमा बुझाएको छ।

महानगरीय प्रहरी परिसर काठमाडौंले करिब तीन महिनाको अनुसन्धानपछि सोमबार उक्त मिसिल काठमाडौं सरकारी वकिल कार्यालयमा बुझाएको काठमाडौं प्रहरी प्रवक्ता डिएसपी मोहन थापाले बताए।

प्रहरीले घटनामा संलग्न मुख्य आरोपी शैलेस कार्कीसहित ४ जनालाई प्रतिवादी बनाएर मिसिल बुझाएको हो। चारै जनाविरुद्ध संगठित अपराधविरुद्धको मुद्दा चलाइएको छ ।

घटनाका मुख्य अभियुक्त पीडित युवतीका प्रेमी भनिएका शैलेश कार्कीलाई चैत ६ गते काठमाडौंको दरवारमार्गबाट पक्राउ गरिएको थियो। घटनामा संलग्न विकास गौतम, रवि पौडेल र दिपक श्रेष्ठ हाल फरार छन् । उनीहरुलाई नै प्रतिवादी बनाएर मुद्दा बुझाइएको छ । उनीहरुको खोजीका लागि इन्टरपोलमा डिफ्यूजन नोटिस जारी गर्ने तयारी गरिएको छ ।

घटना के थियो

दाङ घर भएकी पीडित युवतीले शैलेश कार्कीसहित अन्य तीन जनाले आफुलाई सामुहिक बलात्कार गरेको भन्दै महानगरीय प्रहरी वृत्त दरबारमार्गमा उजुरी हालेकी थिईन ।

शैलेश र युवतीको फेसबुकबाट चिनजान भएको थियो । तर पछि कुराकानी अघि बढ्दै जाँदा उनीहरुको चिनजान प्रेममा परिणत भयो ।

युवतीको बयान अनुसार सोही अनुरुप कार्कीले युवतीलाई दरबारमार्गको ल्याण्डमार्क होटलमा बोलाए । तर, होटलमा कार्की एक्लै थिएनन्, उनले अरु तीनवटा कोठा बुक गरेर आफ्ना तीन जना साथी राखेका थिए ।

युवकहरु मदिरामा मस्त भएका बेला राति आफूमाथि सामूहिक बलात्कार भएको युवतीको दाबी छ ।

घटनालाई मिलाउन महानगरीय प्रहरी वृत्त, दरबारमार्गका तत्कालिन प्रहरी अधिकारी नै अग्रसर भएपछि यो बलात्कार प्रकरण चर्चामा आएको थियो ।