काठमाडौं, २८ वैशाख । भारतीय प्रधानमन्त्री नरेन्द्र मोदी दुई दिने नेपाल भ्रमण छन् । जानकी मन्दिरमा दर्शन गरी अन्य कार्यक्रम सकाएर प्रधानमन्त्री मोदी काठमाडौं आउने तरखरमा रहेका बेला उनकै पार्टीका एक नेताले भने जनकपुर भारतसंग गाभ्नुपर्ने भन्दै ट्वीट गरेका छन् ।

जनकपुरधाम भारतीय भूमीको भन्दै फिर्ता लिन मोदीसमक्ष माग गर्ने व्यक्ति हुन् भारतको लोकसभाका सांसद कीर्ति आजाद । ट्वीटरमा उनले आफ्नो विचार यसरी लेखेका छन् ।

उनले सामाजिक सञ्जाल ट्वीटरमा लेखेका छन्, ‘आदरणीय नरेन्द्र मोदी जी, जनकपुरधाम मिथिलाको राजधानीमा यहाँलाई स्वागत छ, दुई सय साल पहिले अंग्रेज र नेपालका बीचमा भएको सन्धि जसले मिथिलाको भाग नेपालमा दिएको थियो समाप्त भएको छ। मिथिलाको यस भागलाई फिर्ता लिएर सीताआमाको आदर गर्दै मिथिला राज्य घोषणा होस्।’

कीर्ति आजाद सन् २०१४ मा भारतीय जनता पार्टीका तर्फबाट विहारको दरभंगाबाट लोकसभा सदस्यमा निर्वाचित भएका थिए। यसअघि उनी दिल्लीबाट विधानसभा सदस्य समेत रहेका थिए।

पूर्व क्रिकेटर समेत रहेका उनी विहारका पूर्वमुख्यमन्त्री भागवत झा आजादका छोरा हुन्। उनलाई भारतीय जनता पार्टीले २०१५ मा अरुण जेट्लीमाथि भ्रष्टाचारको अभियोग लगाएपछि निष्काशन गरेको थियो।