काठमाडौं, २६ वैशाख । महिला दिवसकै दिन बोक्सीको आरोपमा गत फागुन २४ गते निर्घात कुटपिट र यातना खेपेकी घोडाघोडी नगरपालिका–५ देउकलियाकी राधा चौधरीले गाउँघरमा असामान्य व्यवहार भोग्नुपरेको बताएकी छन्।

घोडाघोडी नगरपालिकाकै सुखडस्थित राष्ट्रिय माविमा कक्षा ११ मा अध्ययनरत उनले भनिन्, ‘विद्यालयमा शिक्षक र साथीभाइले त राम्रो व्यवहार गर्छन्। तर, गाउँघरका कतिपयले अझै बोक्सी भन्ने गरेका छन् ।’

मंगलबार पढाइ खर्चवापत प्राप्त भएको सहयोग रकम बुझ्ने कार्यक्रममा उनले गाउँमा खेपिरहेको भोगाइ सञ्चारकर्मीसामु बताएकी हुन् ।

कुटपिटको घटना भएको केही दिनमै प्रदेश ७ को सरकारले राधाको उच्च शिक्षा र स्वास्थ्य उपचार खर्च व्यर्होने आश्वासन दिएको थियो। तर, यो वर्षको वार्षिक शुल्क आफैंले तिरेको उनले सुनाइन् ।

बोक्सी भगाउने भन्दै राधालाई कुटपिट गर्ने देउकलियाकै रामबहादुर चौधरी उर्फ भोलेबाबा, किस्मती चौधरी लगायतलाई पुर्पक्षका लागि थुनामा राखिएको छ।

सोही कार्यक्रममा राधालाई अध्ययन खर्चका लागि विदेशबाट पठाइएको ५० हजार रुपैयाँ हस्तान्तरण गरिएको छ। हाल बेलायमा बस्दै आएकी खोटाङ बाक्सीला ८ की जयन्ती राईले पत्रकार दीपक उपाध्याय मार्फत पठाएको रकम मंगलबार जिल्ला प्रशासन कार्यालय कैलाली मार्फत राधालाई हस्तान्तरण गरिएको हो।

राधामाथि भएको अमानवीय घटनाबारे विभिन्न सञ्चारमाध्यमबाट थाहा पाएकी राईले चित्रकला मार्फत संकलन भएको रकम राधालाई सहयोग गरेकी हुन्।

यही बैसाख ३० गतेबाट सुरु हुने कक्षा ११ को परीक्षाको तयारी गरिरहेकी राधाले अध्ययन खर्च पठाइदिने राईलाई धन्यवाद दिइन्।