काठमाडौं, २० वैशाख । मुलुकभरका सरकारी तथा निजी अस्पतालमा संक्रमण नियन्त्रण गर्ने कमिटी राख्न चिकित्सकहरुले सुझाव दिएका छन् ।

अस्पतालमा हुने इन्फेक्सन नियन्त्रण र रोकथामबारे बिहीबार काठमाडौंमा भएको सम्मेलनमा चिकित्सकहरुले अस्पतालमा हुने संक्रमणका कारण २५ प्रतिशत मानिसको ज्यान जोखिममा रहेकाले यसको नियन्त्रण गर्न सरोकारवालाहरुको ध्यानाकर्षण गराएका थिए ।

रोटरी क्लव अफ दरवारमार्गको आयोजनामा गरिएको सम्मेलनमा चिकित्सकहरुले अस्पतालले संक्रमण नियन्त्रण गर्न बेवास्ता गर्दा बिरामीको ज्यान जोखिममा परेको भन्दै गुनासो गरेका थिए । अस्पतालभित्रकै संक्रमण नियन्त्रण नगरी उपचार गर्ने हो त्यसले झन् समस्या बढाउने चेतावनी पनि चिकित्सकहरुले दिएका छन् । क्यान्सर रोग बिशेषज्ञ डाक्टर राजन बरालले नेपालमा अस्पतालभित्र हुने संक्रमण नियन्त्रण गर्नका लागी कमिटी राख्न दवाव दिने उदेश्यले नेपालमा पहिलोपटक सम्मेलनको आयोजना गरेको जानकारी दिनुभयो ।

सम्मेलनमा चिकित्सकहरुले मुलुकभरका अञ्चल अस्पतालमा हुने संक्रमण नियन्त्रण नगरी उपचार गराइरहेको पाईएको जनाएका छन् । चिकित्सक र नर्सको लापरबाहीका कारण पनि अस्पतालमा संक्रमण बढेको हुनसक्ने उनीहरुको अनुमान छ ।