काठमाडौँ, १७ वैशाख।  यही वैशाख १० गतेदेखि शुरु भएको वाग्मती तीर्थयात्राको समापन पशुपतिमा पूर्णाहुतिसहित गरिएको छ ।

कटुवाल दहबाट वाग्द्वारसम्म १८ कोशको दूरीमा भएको यात्राका क्रममा हिमवत्खण्डमा उल्लेख भएका नदी किनारका १६५ तीर्थ स्थानमा स्नान एवं पूजा र दर्शन गरिएको थियो । पशुपति रुद्रगाडेश्वरमा आयोजित यात्रा समापनको संकल्प पशुपति क्षेत्र विकास कोषका कोषाध्यक्ष डा मिलनकुमार थापाले गर्नुभयो । यात्रा शुरुआतको संकल्प कोषका सदस्य सचिव डा प्रदीप ढकालले गर्नुभएको थियो । यात्रा समापनका अवसरमा वैदिक र तान्त्रिक दुवै विधिबाट पूजा गरियो ।

वाग्मती प्रदूषित भएपछि रोकिएको यात्रा ४० वर्षपछि पुनःसञ्चालन गर्न कोषले नेतृत्वदायी भूमिका निर्वाह गरेको थियो । यात्रामा गरिनुपर्ने विधिविधानका सबै काम पशुपति आगम घरका पुजारी मदन भट्टले पूरा गर्नुभयो । सत्र दिनको यात्रालाई यस वर्ष सात दिनमा झारिए पनि विधि सबै पूरा गरिएको उहाँले बताउनुभयो । अर्को वर्ष १७ दिनकै यात्रा चलाइने कोषले जनाएको छ ।

वाग्मती यात्रा सञ्चालन गर्न संस्कृति, पर्यटन तथा नागरिक उड्डययन मन्त्रालयले पनि विशेष चासो दिएको थियो । मन्त्रालयले १०० दिनभित्र गर्ने काममा वाग्मती यात्रासमेत परेको छ । सो कार्यक्रम मन्त्री रवीन्द्रप्रसाद अधिकारीले चैत १६ गते सार्वजनिक गर्नुभएको थियो ।

सो यात्रा नेमुनिले चलाएको विश्वास गरिन्छ । सोक्रममा विभिन्न स्थानमा वाग्मतीको तन्त्र साधनासमेत गरिएको थियो । पशुपतिनाथका मूल भट्ट गणेश भट्टको उपस्थितिमा भक्ति र शास्त्रीय संगीतको कार्यक्रमसमेत गरियो । लामो समयदेखि रोकिएको यात्रा पुनःसञ्चालनले भावी पुस्तामा वाग्मती तीर्थ यात्राको महत्व चेतना जागृत हुने सदस्य सचिव डा ढकालले बताउनुभयो । यात्रामा उत्साहका साथ वाग्मती किनारवासी पनि सहभागी भएका थिए । चालीस वर्षपछि यात्रा सञ्चालनले वाग्मती सफाइ महाअभियानलाई समेत सहयोग पुग्ने विश्वास गरिएको छ ।