भैरहवा २० साउन । रुपन्देहीको भैरहवा परासि सडक खण्डको रोहिनी नदी किनारमा नेपाल आयल निगमले तेल भण्डारणका लागि खरिद गरेको जग्गा डुवानमा परेको छ ।

बिहीबारदेखिको लगातारको वर्षाका कारण रोहिणी नदीमा उर्लिएको बाढी निगमले किनेको जमिन डुबानमा परेको हो । निगमले महंगो मुल्य तिरेर किनेको त्यो जमिन खासमा रोहीणी नदिको बगर हो । आयल निगमले खरिद गरेको जग्गा र नदीको सतह बराबर नै भएकाले बर्षतको समयमा हरेक साल ढुवानमा पर्ने गर्दछ ।

रूपन्देहीको साविकका धकधई, पट्खौली र बसन्तपुर गाविसमा करिब साढे १४ विगहा जग्गा निगमले गएको असारमा खरिद गरेको थियो । त्यसमध्ये १४ कठ्ठा जग्गा बगर नदीकै बगर जग्गा हो । जहाँ पहिला रोहिणी नदी बग्दथ्यो । त्यही नदीले पश्चिमतर्फ कटान गरेपछि पूर्वतर्फ बगर बनेको थियो । अहिले नदीको उर्लिएको भेल निगमको जग्गाबाट बगेको छ । भू–माफियासँग चलनचल्तीको मूल्य भन्दा दोब्बर बढीमा निगमले जग्गा खरिद गरेको थियो ।

ओमसतिया गाउँपालिका वडा नं ४ र ५ मा पर्ने रोहणी नदी किनारको चल्तीको न्यूनतम मूल्य साढे एक लाखदेखि तीन लाख रूपैयाँ पर्दछ । तर निगमले दशदेखि १३ लाख रूपैयाँमा खरिद गरेको छ । निगमले एक सय चार कित्ता जग्गा ३१ करोड ४० लाख ७९ हजार २० रूपैयाँमा खरिद गरेको मालपोत कार्यालय भैरहवाको रेकर्डमा छ ।

१४ बिघामा किन्दा १९ करोड घोटाला
मालपोत कार्यालयका अनुसार निगमले किनेको जमिन औसतमा प्रति कठ्ठा ४ लाख ११ हजार पर्न जान्छ । यो आधारमा १ बिघा जमिनको मुल्य ८२ लाख २० हजार हुन्छ भने निगमले खरिद गरेको १४ बिघा जमिनको मुल्य ११ करोड ५० लाख ८० हजार पर्छ । तर, निगमले ३१ करोड ४४ लाख ५६ हजार १ सय तिरेको छ । यो हिसावले निगमले जग्गा खरिद गर्दा १९ करोड ९३ लाख ७६ हजार १ सय घोटाला भएको देखिन्छ ।