काठमाडौं, २८ जेठ । बाँकेको बैजनाथ गाउँपालिकामा अतिक्रमित सरकारी जग्गा खाली गराउने क्रममा प्रहरीमाथि धारिलो हतियार प्रहार भएको छ।बैजनाथ गाउँपालिका-६ एच गाउँस्थित ईश्वरी माध्यमिक विद्यालयको जग्गामा बनाइएका अवैध संरचना भत्काउन डोजर चलाउँदा स्थानीय एक महिलाले प्रहरीमाथि आक्रमण गरेकी हुन्।उक्त जग्गामा घरटहरा निर्माण गरी बस्दै आएकी अन्दाजी ३६ वर्षीया शाबित्री कुमारी शाहीले सुरक्षार्थ खटिएका प्रहरी टोलीमाथि दाउ प्रहार गरेकी हुन्।आक्रमणबाट प्रहरी चौकी सम्झना बाँकेमा कार्यरत प्रहरी हवल्दार सुनिल कुमार चौधरी घाइते भएका छन्। हवल्दार चौधरीको दाहिने काँध पछाडिको भागमा सामान्य निलडाम देखिएको र उनको स्वास्थ्य अवस्था सामान्य रहेको प्रहरीले जनाएको छ।प्रहरीमाथि आक्रमण भएलगत्तै घटनास्थलबाट शाबित्री कुमारी शाहीलाई प्रहार गरिएको दाउसहित प्रहरीले नियन्त्रणमा लिएको छ। पक्राउ परेकी शाहीमाथि आवश्यक कानुनी कारबाहीका लागि थप अनुसन्धान भइरहेको छ।
पटक–पटकको सूचना अटेर गरेपछि डोजर

ईश्वरी माध्यमिक विद्यालयले आफ्नो नाममा रहेको उक्त जग्गा लिजमा दिएको थियो। लिज अवधि सकिएपछि र सर्त उल्लङ्घन भएपछि विद्यालय र गाउँपालिकाले पटक(पटक सूचना जारी गर्दै जग्गा खाली गर्न आग्रह गरेका थिए।

तर, सम्बन्धित व्यक्तिले संरचना हटाउन अटेर गरेपछि स्थानीय सरकार र प्रहरीको संयुक्त टोली आज डोजर लिएर त्यहाँ पुगेको थियो।

जग्गा ओगटेर बस्नेहरूले गाउँपालिकाको सूचनालाई बेवास्ता गरेपछि जिल्ला प्रशासन कार्यालय बाँकेले जेठ २७ गते पत्र काट्दै अतिक्रमित संरचना हटाउने कार्य अघि बढाउन निर्देशन दिएको थियो।

सोही पत्रको आधारमा आज संरचना भत्काउने काम सुरु गरिएको गाउँपालिकाले जनाएको छ।