बझाङ,१० वैैशाख । बस्ती सार्न माग गर्दै बझाङ थलारा गाँउपालिका ९ आमबगरका स्थानीय बासिन्दाले मानव अधिकार आयोगको क्षेत्रीय कार्यालयमा उजुरी दिएका छन् ।

तीन वर्ष अगाडि निर्माणका गरिएको सडकका कारण २५ घर परिपवार पहिरोको उच्च जोखिमा रहेकोमा अझैसम्म सरकारले समस्या समाधान गर्न कुनै चासो नदेखाएको भन्दै स्थानीयबासिन्दाले मानवअधिकारको कार्यालयमा उजुरीका साथै उनीहरुले प्रदेश नम्बर ७ का मुख्य मन्त्रीलाई ज्ञापन बुझाएका हुन ।

‘तीन वर्ष भैसक्यो, पानी पर्दा गाउँभरका मान्छे सुत्न पाउदैनौ ’, थलरा गाउँका स्थानीय बासिन्दा विश्वप्रकाश जोशीले भन्नुभयो, ‘ बर्खाको समयमा पानी पर्दा रात बिताउन बालबच्चा च्यापेर चौरमा दौडिनु पर्छ । आफूहरुले शान्तसँग बाँच्न नपाएपछि मुख्यमन्त्रीलाई ज्ञापन पत्र बुझाउनु परेको हो ।’

तीन वर्ष अघि सडक डिभिजन कार्यालय बैतडीले निर्माण गरेको जडार कोइरालकोट सडकका कारण सुरु भएको पहिरोले गाउँ नै जोखिममा परेपछि सुरक्षित ठाउँमा बस्ती सार्न माग गर्दै पीडितहरुले मुख्य मन्त्रीको कार्यालयमा पुगेर ज्ञापन पत्र बुझाएका हुन ।
२०७२ साल वैशाखमा निर्माण सुरु भएको जडार कोइरालकोट सडकका कारण बस्ती जोखिममा परेको थियो । सडक निर्माण गर्ने क्रममा आएको पहिरोले ८ घर पूर्ण रुपमा भत्काएको थियो भने २५ परिवारको करिब ६० रोपनी जग्गा र त्यसमा लगाएको बालिनालि समेत पुरेको थियो । यसै पहिरोले यस बस्तीको लागि निर्माण गरेको २ करोड बराबरको खानेपानी र सिंचाई योजना समेत पूर्णरुपमा क्षतिग्रस्त भएको थियो । त्यसलगत्तै २०७३ सालमा त्यसै गाउँको सिरानीमा जडार कोइरालकोट सडकभन्दा करिब ५० मिटर जति तल अर्काे पानकोट पौडी सडक निमार्ण सुरु भए पछि पहिरोको खतरा झन बढेको हो ।
पिडितहरुको ज्ञापन पत्र बुझ्दै मुख्यमन्त्री भट्टले तत्कालका लागि पहिरो रोक्ने उपाय अपनाउनका लागि प्रदेश सरकारले पहल गर्ने बताउनुभएको छ ।
उहाँले आफू स्वयं बझाङ पुगेर स्थलगत निरीक्षण गरेपछि बस्ती पुनस्र्थापनाको लागि आवश्यक पहल गर्ने बताउनुभयो ।