काठमाडौं, १९ साउन । आयल निगमको जग्गा खरिद प्रकरणमा सबैभन्दा बढी निगमका प्रवन्ध निर्देशक गोपालबहादुर खड्काको भूमिका देखिन्छ । निगमको प्रमुख भएका हैसियतले स्वभाविक रुउमा खड्काको भूमिका बढी हुन्छ । बढी भूमिका राम्रो कामका लागि आवश्यक थियो । तर, प्रवन्ध निर्देशक खड्काको बढी भूमिका नराम्रो काममा देखियो । अहिलेसम्मको अध्ययनले भन्छ : दलला मार्फत सस्तोमा जमिन किनेर आयल निगमलाई महंगोमा बिक्रि गराउने मुख्य गिरोह प्रवन्ध निर्देशक खड्का नै हुन । आयल निगमले जग्गा खरिदका लागि बोलपत्र आह्वान नै नगरी जग्गा दलालले निगमको लागि भन्दै जमिन खरिद गर्न र पछि त्यही जमिन निगमले खरिद गर्नुले यो कुरा प्रष्ट पारिसकेको छ । आखिर को हुन त करोडौं घोटालाका योजनाकार गोपालबहादुर खड्का ?

को हुन गोपालबहादुर खड्का ?
हाल नेपाल आयल निगमका प्रवन्ध निर्देशक रहेका गोपालबहादुर खड्का सिन्धुलीको खाङसाङ सोल्पामा जन्मिएका हुन । हाल उनी घट्टकुलो काठमाडौंका स्थायी वासिन्दा हुन । भारतबाट सिभिल इञ्जिनियरिङमा स्नातक गरेका खड्काले पोखरा विश्वविद्यालयबाट कन्स्ट्रक्सन मेनेजमेन्टमा स्नातकोत्तर गरेका छन् । खड्काले विक्रम संवत् २०४७ बाट सडक विभागमा इञ्जिनियरको रुपमा जागिर सुरु गरेका हुन । उनले २०६१ सालसम्म इञ्जिनियरकै रुपमा सडक डिभिजनमा काम गरेका थिए । त्यसपछि उनले २०६७ साल देखी २०७० सालसम्म सडक डिभिजन कार्यालय काडमाडौको प्रमुखको रुपमा काम गरे । सडक डिभिजन कार्यालय काठमाडौंमा काम गर्दासम्म गोपालबहादुर खड्काको छवि राम्रै थियो । उनीसँगै काम गरेकाहरु समेत डिभिजन प्रमुख हुँदासम्म उनले राम्रो कार्यसम्पादन गर्ने गरेको बताउँछन् । उनी २०७१ माघ १४ गते नेपाल आयल निगमको प्रमुख नियुक्त भएका हुन । आयल निगमको प्रमुख नियुक्त भएपछि उनका हरेक काम विवादको विषय बन्न पुग्यो ।

लोकमानसँगको सम्बन्धले निगम प्रमुख

बर्खास्तमा परेका अख्तियार दुरुपयोग अनुसन्धान आयोगका प्रमुख लोकमान सिंह कार्की र गोपालबहादुर खड्काबीच ज्वाई जेठानको सम्बन्ध छ । पारिवारिक सम्बन्ध जोडिएकाले लोकमान र गोपालबहादुर नजिक हुने स्वाभाविक थियो । सूर्यबहादुर थापाका छोरा सुनिलबहादुर थापा आपूर्ति मन्त्री भएका बेला गोपालबहादुर खड्का आयल निगमको प्रमुख बनाइए । आयल निगम छिरेपछि गोपालबहादुर पनि लोकमान जस्तै भ्रष्ट बने । लोकमानकै आडमा गोपालबहादुरले संसदको निर्देशन पनि अवज्ञा गर्दै नाकावन्दीका बेला बिराटनगरको विराट आयललाई पेट्रोल आयात गर्ने अनुमति मात्र दिएनन्, तेल ल्याएर महंगो मूल्यमा कालोबजारी गर्ने छुट दिए । यससँगै बढेको उनको उन्माद आयल निगमका लागि जग्गा खरिद प्रकरणमा छताछुल्ल भएको छ ।

लोकमानको बलमा अख्तियारमा दादागिरि
जुन बेला लोकमानसिंह कार्की अख्तियार प्रमुख थिए त्यसै बेला गोपालबहादुर खड्का आयल निगमको प्रमुख बनिसकेका थिए । भारतले नाकाबन्दी गरेको बेला खड्काले लोकमानकै बलमा इन्धन बितरणमा लाखौं घोटाला गर्न भ्याए । जुन समय खड्काले इन्धन वितरणको क्रममा घोटाला गरेको भन्दै अख्तियारले अनुसन्धान सुरु गरेको थियो । त्यो समय खड्का दर्जनौ पटक अख्तियार पुगेका थिए । खड्काले अख्तियार पुगेर लोकमानकै बलमा मलाई अनुसन्धान गर्ने तिमी को हौ भन्दै भन्दै आयुक्त र अनुसन्धान अधिकृतहरुलाई थर्काएको बिषय पहिले नै सार्वजनिक भइसकेको छ ।

लोकमानकै बलमा मनपरी कर्मचारी बढुवा
लोकमानको साथ पाएपछि आफुलाई शक्तिशाली महसुस गरेका गोपालबहादुर खड्काले नियमविपरीत कर्मचारी बढुवा समेत गर्न भ्याए । लोकमान शक्तिमै रहेको बेला उनले, लोकसेवा आयोगको मापदण्डविपरीत र निगम सञ्चालक समितिलाई थाहै नदिई १४ जना कर्मचारीको बढुवा गरेका थिए । लोकमान र आफ्नो पक्षमा रहेकालाई उनले बढुवा गरेका थिए । कर्मचारी बढुवा गर्नुभन्दा अगाडी खड्कालाई लोकसेवा आयोग र अख्तियारले मापदण्ड बनाएर मात्र कर्मचारीको बढुवा गर्न निर्देशन दिएको थियो । तर, खड्काले लोकमानकै बलमा बिना मापदण्ड कर्मचारीको बढुवा गरिदिए ।

गोपाललाई नयाँ अख्तियार प्रमुखको बल
लोकमान सिंह कार्की निलम्बनका परेपछि अख्तियार प्रमुख बन्ने अवसर दीप बस्न्यातलाई मिल्यो । खड्कालाई “घीउ पोखियो कहाँ, दालमा” भने झैं भयो । गोपालबहादुर खड्का दीप बस्न्यातका सम्धी हुन् । आफ्नै सम्धि अख्तियार प्रमुख भएपछि गोपालबहादुर खड्कालाई झनै आँट् मिल्यो । यतिखेर उनी, अख्तियार प्रमुखकै बलमा करोडौंको घोटाला गर्न अग्रसर छन् । इन्धन भण्डारणका लागि चार ठाउँमा जमिन खरिद गर्दा करोडौं घोटाला भएको प्रशस्त प्रमाण सार्वजनिक भइसकेको छ । तर, प्रवन्ध निर्देशक खड्का भने सबै प्रकृया पुरा गरेर जग्गा खरिद गरिएकाले कुनै पनि पक्षबाट घोटाला नभएको दावी गर्छन् । प्रवन्ध निर्देशक खड्का कुनै पनि पक्षबाट घोटाला नभएको भनिरहेतापनि अहिलेसम्म सार्वजनिक भएको प्रमाणहरुले करोडौं घोटाला भएको लुक्न सक्दैन । तर, गोपालबहादुर खड्कालाई अझै पनि अख्तियारले फन्दामा पार्न सकेको छैन । गएको मंगलबार खड्कालाई पक्राउ गर्न अख्तियारको टोली आयल निगम पुगिसकेको थियो । तर, पक्राउ गर्न आयल निगम पुगेका टोलीलाई एक अज्ञात फोन आयो । र, गोपालबहादुर खड्का पक्राउबाट बचेका छन् । यसरी हेर्दा गोपालबहादुर खड्का सामान्य इञ्जिनियर हुँदै ठूलो गिरोहको नेतृत्व गर्नसक्ने भइसकेका छन् ।

इन्धन भण्डारण केन्द्र स्थापनाका लागि जग्गा खरिद प्रकरणमा करोडौं घोटाला भएको कोहीबाट लुक्न सक्दैन । अहिलेसम्म सार्वजनिक भएका तथ्यहरु नै करोडौंका प्रमाण हुन । जग्गा खरिदको क्रममा निगमले घोटाला गरेको कुरा सामान्य नागरिकले समेत सहजै बुझ्न सक्छन् । प्रति कठ्ठा २ लाख पनि नपर्ने जमिनलाई १५ लाख रुपैयाँ तिरेर खरिद गर्नु घोटाला हो कि होइन ? यो नाङ्गो आँखाले ठम्याउने कुरा हो । तर, गोपालबहादुर खड्का प्रकृया मिलाएर घोटाला गर्न माहिर छन भन्ने कुरा जग्गा खरिदमा भएको घोटाला प्रकरणले पुष्टि गरेको छ । नियम अनुसार, सरकारको स्वामित्वमा रहेको निगमका लागि जग्गा खरीद गर्दा जग्गा प्राप्ति ऐन प्रयोग हुनुपर्ने थियो । तर, घोटाला गर्न दलालसँग सेटिङ गरिसकेका खड्काले सार्वजनिक खरिद ऐन प्रयोग गरेर करोडौ घोटाला गरेका छन् । यद्यपि, घोटाला प्रकण अनुसन्धानको क्रममा छ । आशा गरौं, घोटाला गर्नेकै पक्षमा अनुसन्धानको रिपोर्ट बन्ने छैन ।