काठमाडौं, २९ चैत । ३३ किलो सुन तस्करी र मोरङ उर्लाबारीका सनम शाक्यको हत्या प्रकरणमा जोडिएका नेपाल एयरलाइन्सका तीन कर्मचारी पक्राउ परेका छन्। अनुसन्धान समितिले राजन थापासहित तीन जनालाई बुधबार पक्राउ गरेको हो।

गत फागुन १८ गते तस्करीको ३३ किलो सुन लुकाएको आशंकामा शाक्यको हत्या भएको थियो। हत्यामा संलग्न सुन तस्करहरुलाई महानगरीय अपराध महाशाखाले जोगाएको खुलेपछि गृह मन्त्रालयले सहसचिव इश्वरचन्द्र पौडेलको संयोजकत्वमा छानबिन समिति गठन गरेको थियो।

समितिले थप छानबिन गर्दा सो सुन विमानस्थलबाटै तस्करी भएको खुलेको हो।

अनुसन्धानमा लापबाही गरेको आरोपमा महाशाखाका एसएसपी दिवेश लोहनीसहित तीन प्रहरीलाई जिम्मेवारीबाट हटाइसकिएको छ।

थाई एयरलाइन्सका ८ जना कर्मचारीसहित गरी हालसम्म सो घटनामा संलग्न १९ जना पक्राउ परिसकेका छन्।

जिल्ला प्रहरी कार्यालय मोरङले संगठित अपराध मुद्दामा उनीहरुविरुद्ध कारबाही अघि बढाएको छ।