काठमाडौं, : प्रतिनिधि सभाको बैठक सूचना टाँस गरेर स्थगित गरिएको छ। २०८२ फागुन २१ गते सम्पन्न निर्वाचनपश्चात् गठित नयाँ संसदको इतिहासमा पहिलो पटक यसरी सूचना टाँसेर बैठक स्थगित भएको हो।

सभामुख डोलप्रसाद अर्यालले बैठक सञ्चालनका लागि पटक-पटक प्रयास गरे पनि विपक्षी दलहरूको निरन्तरको अवरोधका कारण बैठक अगाडि बढ्न सकेन। सुरुमा विपक्षीहरूको विरोधपछि सभामुख अर्यालले बैठक १५ मिनेटका लागि स्थगित गरेका थिए। तर, तोकिएको समयभित्र पनि सहमति जुट्न नसकेपछि अर्को सूचना नभएसम्मका लागि भन्दै मंगलबारसम्म बैठक स्थगित गरिएको संसद सचिवालयले जनाएको छ।

के हो विवादको चुरो?

संसद बैठक अवरुद्ध हुनुको मुख्य कारण प्रधानमन्त्री बालेन शाहको विवादास्पद अभिव्यक्ति बनेको छ। प्रधानमन्त्री शाहले सार्वजनिक कार्यक्रममा ‘नेपालले पनि भारतको जग्गा मिचेको रहेछ’ भन्ने आशयको अभिव्यक्ति दिएका थिए। विपक्षी दलहरूले प्रधानमन्त्रीको सो भनाइप्रति आपत्ति जनाउँदै उक्त अभिव्यक्ति कि त फिर्ता लिनुपर्ने र संसदको रेकर्डबाट हटाउनुपर्ने, नत्र प्रमाण पेस गर्नुपर्ने अडान राख्दै आएका छन्।

यता, सत्तापक्षको नेतृत्व गरिरहेको राष्ट्रिय स्वतन्त्र पार्टी (रास्वपा) ले भने उक्त विषयमा परराष्ट्र मन्त्रालयले आवश्यक स्पष्टीकरण दिइसकेको जनाएको छ। रास्वपाका तर्फबाट परराष्ट्र मन्त्रीले थप प्रष्ट पार्न सकिने बताउँदै आए पनि विपक्षी दलहरूले आफ्नो अडान नछाड्दा सदनको कामकारबाही प्रभावित भएको छ।

पछिल्लो समय सत्तापक्ष र विपक्षीबीचको बढ्दो दूरीका कारण सदनको कारबाहीमा देखिएको यो गतिरोधले नयाँ संसदको सुरुवाती दिनहरूमा नै चुनौती थपेको छ।