काठमाडौं १३ जेष्ठ । काठमाडौं, १४ जेठ — राष्ट्रपति रामचन्द्र पौडेलले विश्वको सर्वोच्च शिखर सगरमाथाको प्राकृतिक स्वरूपलाई जीवन्त राख्न र हिमाली वातावरण संरक्षण गर्न सरोकारवालाहरूमा आग्रह गर्नुभएको छ ।

अन्तर्राष्ट्रिय सगरमाथा दिवस (मे २९) को पूर्वसन्ध्यामा विश्वभरका पर्वतारोहीहरूको उपस्थितिमा आयोजित कार्यक्रमलाई सम्बोधन गर्दै राष्ट्रपति पौडेलले सगरमाथा नेपालको मात्र भौगोलिक पहिचान नभई राष्ट्रको प्रतिष्ठा, गौरव र विश्वकै अमूल्य प्राकृतिक सम्पदा भएको बताउनुभयो ।

“सगरमाथा नेपालको भौगोलिक पहिचान मात्र होइन, यो सिंगो देशको प्रतिष्ठा, गौरव र विश्वकै अमूल्य प्राकृतिक सम्पदा हो,” राष्ट्रपति पौडेलले भन्नुभयो, “यसको संरक्षण र सन्तुलित उपयोगबाट पर्यटन क्षेत्रमार्फत मुलुकको अर्थतन्त्रमा दिगो टेवा पुग्छ ।”

राष्ट्रपतिले जलवायु परिवर्तन र हिमाली क्षेत्रमा बढ्दो फोहोरलाई प्रमुख चुनौतीका रूपमा औंल्याउनुभयो । उहाँले भन्नुभयो, “जलवायु परिवर्तनका असर र पर्वतारोहण क्षेत्रमा फोहोर थुप्रिने समस्या ठूलो चुनौती बनेका छन् । यी समस्याको समाधान गर्दै सगरमाथा क्षेत्रको जैविक विविधता संरक्षण गर्नुपर्छ र पर्वतारोहणलाई सुरक्षित, दिगो तथा प्रविधिमैत्री बनाउन थप प्रयास र अन्तर्राष्ट्रिय सहकार्य आवश्यक छ ।”

दिगो हिमाली पर्यटन र जिम्मेवार पर्वतारोहण आजको आवश्यकता रहेको बताउँदै राष्ट्रपतिले सम्मेलनले पर्वतारोहणबाट प्राप्त ज्ञानलाई सगरमाथाको संरक्षणमा उपयोग गर्ने विश्वास व्यक्त गर्नुभयो ।

सन् १९५३ मा तेञ्जिङ नोर्गे शेर्पा र एडमण्ड हिलारीले पहिलो पटक सगरमाथाको सफल आरोहण गरेको ऐतिहासिक दिनको सम्झना गर्दै राष्ट्रपति पौडेलले कीर्तिमानी आरोही तथा शेर्पा समुदायप्रति सम्मान व्यक्त गर्नुभयो ।

कार्यक्रममा हिमाली क्षेत्रको बहुआयामिक पक्ष, जलवायु परिवर्तन तथा सगरमाथा संरक्षणमा अन्तर्राष्ट्रिय सहकार्य बढाउने विषयमा छलफल भएको थियो ।