काठमाडौं ३० वैशाख । नेपाली कांग्रेस ले प्रतिनिधि सभा बैठकमा प्रधानमन्त्री बालेन शाहको लगातार अनुपस्थितिलाई लिएर कडा असन्तुष्टि जनाएको छ। नीति तथा कार्यक्रममाथि छलफल चलिरहेका बेला प्रधानमन्त्री सदनमा उपस्थित नभएको भन्दै कांग्रेसले सभामुखमार्फत रुलिङ नै मागेको हो।

आकस्मिक समय लिएर बोलेका कांग्रेस सांसद निश्कल राईले प्रधानमन्त्रीको अनुपस्थितिले संसद्को गरिमामाथि नै प्रश्न उठेको बताएका छन्। उनले सभामुखलाई समेत लक्षित गर्दै सदनको सम्मान जोगाउन तत्काल प्रधानमन्त्रीलाई बैठकमा उपस्थित गराउन आग्रह गरे।

‘हजुरले सभाको इज्जत राख्न सक्नुभएन भने कसैले पनि सदनको गरिमा जोगाउन सक्दैन,’ राईले भने, ‘प्रधानमन्त्रीज्यूलाई तत्काल सदनमा बोलाउन रुलिङ गरियोस् ।’

सरकारको नीति तथा कार्यक्रममाथि उठेका प्रश्नको जवाफ दिने दिनमै प्रधानमन्त्री अनुपस्थित हुनु गैरजिम्मेवार शैली भएको भन्दै कांग्रेसले आलोचना गरेको छ। प्रधानमन्त्रीको स्वास्थ्य अवस्थाबारे पटक–पटक चासो उठ्दा पनि सरकारले स्पष्ट जानकारी नदिएको भन्दै प्रतिपक्षले सरकार पारदर्शी बन्नुपर्ने माग गरेको छ।

संसद् चलिरहेका बेला प्रधानमन्त्रीको निरन्तर अनुपस्थितिले सरकार संसद्प्रति जवाफदेही छ कि छैन भन्ने गम्भीर प्रश्न उब्जिएको टिप्पणी समेत हुन थालेको छ। विपक्षी दलहरूले प्रधानमन्त्रीको मौनता र अनुपस्थितिलाई “संसद्को अपमान” का रूपमा चित्रित गर्न थालेका छन्।