काठमाडौं २८ वैशाख । Turkish Airlines को जहाजमा आगलागी भएपछि केही समय अवरुद्ध भएको Tribhuvan International Airport को सेवा पुनः सञ्चालनमा आएको छ ।

सोमबार बिहान इस्तानबुलबाट काठमाडौं आएको टर्किस एयरलाइन्सको विमान अवतरण गर्ने क्रममा पांग्रामा अचानक आगलागी भएको थियो । धावनमार्गमा धुँवा देखिएपछि विमानस्थलमा केहीबेर त्रासको अवस्था सिर्जना भएको थियो ।

घटनालगत्तै विमानस्थलमा तयारी अवस्थामा रहेका दमकल र उद्धार टोली परिचालन गरिएको थियो । दमकलको सहायताले केही मिनेटमै आगो नियन्त्रणमा लिइएको विमानस्थल स्रोतले जनाएको छ । त्यसपछि विमानलाई ट्याक्सी वेबाट तानेर पार्किङ क्षेत्रमा लगिएको थियो ।

घटनापछि सुरक्षा सतर्कता अपनाउँदै केही समयका लागि उडान तथा अवतरण सेवा रोकिएको थियो । जहाज सुरक्षित स्थानमा सारिएपछि विमानस्थलको सेवा पुनः सुचारु गरिएको हो ।

विमानमा सवार सबै यात्रु तथा चालक दलका सदस्य सकुशल रहेको बताइएको छ । कुनै मानवीय क्षति नभएको र यात्रुहरूलाई सुरक्षित रूपमा जहाजबाट बाहिर निकालिएको विमानस्थल स्रोतले जनाएको छ ।

प्रारम्भिक रूपमा प्राविधिक समस्या वा ब्रेक सिस्टममा अत्यधिक तापक्रमका कारण पांग्रामा आगलागी भएको अनुमान गरिएको छ । घटनाबारे थप प्राविधिक अनुसन्धान सुरु गरिएको छ ।