काठमाडौं २२ वैशाख । पाकिस्तानका उपप्रधानमन्त्री एवं विदेशमन्त्री मोहम्मद इसाक डार र इरानका विदेशमन्त्री सैयद अब्बास अराघचीबीच टेलिफोन वार्ता भएको छ । सो वार्तामा क्षेत्रीय पछिल्ला घटनाक्रम र शान्ति स्थापनाका लागि भइरहेका प्रयासहरूका बारेमा विस्तृत छलफल भएको पाकिस्तानको परराष्ट्र मन्त्रालयले सोमबार जानकारी दिएको छ । मन्त्रालयद्वारा जारी विज्ञप्तिअनुसार, दुई मन्त्रीबीचको छलफल मुख्यतया क्षेत्रीय तनाव कम गर्न र कुटनीतिक माध्यमबाट संवादलाई अगाडि बढाउन पाकिस्तानले निर्वाह गरिरहेको भूमिकामा केन्द्रित थियो । वार्ताका क्रममा इरानी विदेशमन्त्री अराघचीले क्षेत्रीय तनाव न्युनिकरणका लागि पाकिस्तानले खेलिरहेको रचनात्मक भुमिका र सरोकारवाला पक्षहरूबीच गरेको मध्यस्थता प्रयासको प्रशंसा गर्नुभयो । उहाँले क्षेत्रीय स्थिरता प्रवद्र्धनमा इस्लामावादको सक्रिय संलग्नताको महत्त्वलाई स्वीकार गर्नुभयो । 
सो अवसरमा पाकिस्तानी विदेशमन्त्री डारले रचनात्मक कुटनीतिक संलग्नताका लागि पाकिस्तानको निरन्तर प्रतिवद्धता दोहो¥याउनु भयो । उहाँले विद्यमान विवादहरूको शान्तिपूर्ण समाधान र दीर्घकालीन क्षेत्रीय स्थिरताका लागि संवाद र कुटनीति नै एक मात्र निर्विकल्प मार्ग भएकोमा जोड दिनुभयो ।
दुवै पक्षले वर्तमान चुनौतीहरूलाई सम्बोधन गर्न र क्षेत्र तथा विश्वमै स्थायी शान्ति कायम गर्न निरन्तर कुटनीतिक प्रयास आवश्यक रहेको कुरामा सहमति जनाएका छन् ।