काठमाडौँ, — संयुक्त राष्ट्रिय सुकुमवासी मोर्चाका कार्यवाहक अध्यक्ष नारायण परिश्रमीलाई प्रहरीले शुक्रबार बिहान नियन्त्रणमा लिएको छ।

जिल्ला प्रहरी परिसर काठमाडौँका एसपी पवन भट्टराईले परिश्रमी पक्राउ परेको पुष्टि गर्दै उनी हाल प्रहरीको नियन्त्रणमा रहेको जानकारी दिए। “उहाँलाई प्रहरीले पक्राउ गरेको छ। परिसरमा भने अझै ल्याइएको छैन, उहाँ होल्डमा हुनुहुन्छ,” उनले बताए।

प्रहरीले बिहीबार साँझ बागमती नदी किनार आसपास माइकिङ गर्दै थापाथली, सिनामंगललगायत क्षेत्रमा बसोबास गर्दै आएका सुकुमवासीहरूलाई बस्ती खाली गर्न निर्देशन दिएको थियो। त्यसको भोलिपल्टै मोर्चाका कार्यवाहक अध्यक्ष परिश्रमी पक्राउ परेका हुन्।

पक्राउको कारणबारे प्रहरीले विस्तृत विवरण सार्वजनिक गरिसकेको छैन। तर, सुकुमवासी बस्ती हटाउने सरकारी तयारीसँगै सम्भावित विरोध र आन्दोलनको सन्दर्भमा यो कदम चालिएको अनुमान गरिएको छ।

यस घटनाले सुकुमवासी व्यवस्थापन, वैकल्पिक बसोबासको व्यवस्था, र राज्य–नागरिक सम्बन्धबारे नयाँ बहस उत्पन्न गर्ने देखिएको छ।