काठमाडौं, ४ वैशाख । गृहमन्त्री सुधन गुरुङ ले कानुन उल्लंघन गर्ने कसैलाई पनि नछाड्ने स्पष्ट सन्देश दिएका छन्। आफ्नै परिवारका सदस्य भए पनि कारबाहीबाट उन्मुक्ति नदिने उनको भनाइ छ।

बिहीबार साँझ सुरक्षा मामिलामा रिपोर्टिङ गर्ने पत्रकारहरूसँगको भेटघाटमा उनले भने, “म गल्ती गर्ने कसैलाई छाड्दिनँ। मेरै बाबुले गल्ती गरे पनि छाड्दिनँ।”

उनका अनुसार अहिले सरकारको प्राथमिकता अनुहार नहेरी कानुनको दायरामा ल्याउने रहेको छ।

तर, उनले न्यायालयप्रति भने असन्तुष्टि व्यक्त गरे। विशेषगरी केपी शर्मा ओली लाई पक्राउ गरेपछि अदालतले छाडेको घटनाप्रति उनले गुनासो पोखे।

गुरुङले भने, “रातभर म र दुई आईजीपी बसेर काम गर्‍यौं, तर अदालतले तुरुन्तै छाडिदियो। हाम्रो मेहनत खेर गयो।”

उनले कानुनी जटिलताका कारण अपराध नियन्त्रणमा चुनौती आएको स्वीकार गर्दै अब स्वयं कानुन अध्ययन गर्न थालेको जानकारी दिए। भविष्यमा पक्राउ गर्दा अदालतले छुटाउन नसक्ने आधार तयार गरेर अघि बढ्ने उनको योजना छ।

उनका अनुसार हाल केही वीआईपीमाथिको कारबाही सुस्त देखिए पनि त्यो रणनीतिक तयारीका कारण भएको हो, न कि कमजोरीका कारण।

“अब यस्तो आधार तयार पारिन्छ कि अदालतले पनि छाड्न नसकोस्। तर गल्ती गर्नेलाई कारबाही गर्ने काम रोकिन्न,” उनले स्पष्ट पारे।

गृहमन्त्रीको यो अभिव्यक्तिले एकातिर सरकारको कडा रुख देखाएको छ भने अर्कोतर्फ कार्यपालिका र न्यायपालिकाबीचको समन्वय र सीमाबारे बहससमेत चर्किने संकेत देखिएको छ।