रूपन्देही । प्रतिनिधिसभा निर्वाचनअन्तर्गत रूपन्देही–२ मा राष्ट्रिय स्वतन्त्र पार्टी (रास्वपा) का उम्मेदवार सुलभ खरेलले सुरुवाती मतगणनामा उल्लेखनीय अग्रता बनाएका छन्।
पछिल्लो मतपरिणामअनुसार खरेलले ४,०७४ मत प्राप्त गरेका छन् भने नेकपा एमालेका उपाध्यक्ष विष्णु पौडेलले ८४५ मत मात्र प्राप्त गरेका छन्। यस आधारमा खरेलले पौडेलभन्दा चार गुणाभन्दा बढीको फराकिलो मतान्तर कायम गरेका छन्।
त्यस्तै तेस्रो स्थानमा रहेका नेपाली कांग्रेसका उम्मेदवार चुन्नप्रसाद शर्मा पौडेलले ५०४ मत प्राप्त गरेका छन्।
यो नतिजा तिलोत्तमा नगरपालिका वडा नम्बर १ र बुटवल उपमहानगरपालिका वडा नम्बर १ को मतगणनाबाट आएको हो। हाल सैनामैना नगरपालिका वडा नम्बर १ को मतगणना जारी रहेको निर्वाचन अधिकृतको कार्यालयले जनाएको छ।
रूपन्देही–२ निर्वाचन क्षेत्रमा बुटवल उपमहानगरपालिकाका वडा नम्बर १ देखि १३ सम्म, तिलोत्तमा नगरपालिकाका वडा नम्बर १ देखि ६ सम्म तथा सैनामैना नगरपालिकाका वडा नम्बर १ देखि ४ सम्मका मतदाता समेटिएका छन्।
यस क्षेत्रमा नेकपा एमालेका विष्णु पौडेल, नेपाली कांग्रेसका चुन्नप्रसाद शर्मा पौडेल, रास्वपाका सुलभ खरेल, नेपाली कम्युनिस्ट पार्टी (नेकपा) का विश्वदीप पाण्डे, जनता समाजवादी पार्टी (जसपा) का दीपक गुरुङ, जनमत पार्टीका रमेश लोध लगायत विभिन्न दल तथा स्वतन्त्र उम्मेदवार गरी जम्मा ३९ जना प्रतिस्पर्धामा छन्।
सुरुवाती मतपरिणामले रूपन्देही–२ मा प्रतिस्पर्धा रोचक बन्दै गएको संकेत गरेको छ। मतगणना जारी रहेकाले अन्तिम परिणामका लागि भने थप प्रतीक्षा गर्नुपर्ने निर्वाचन अधिकारीहरूले बताएका छन्।
प्रतिक्रिया दिनुहोस्