रुकुमपूर्व । हिमाली जिल्ला रुकुमपूर्वको एकमात्र प्रतिनिधिसभा निर्वाचन क्षेत्रको मतगणना शुक्रबार बिहानदेखि सुरु भएको छ।

बिहीबार सम्पन्न मतदानपछि रातभर संकलन गरिएका मतपेटिका मुख्य निर्वाचन अधिकृतको कार्यालयमा ल्याइपुर्‍याइएपछि मतगणना प्रक्रिया औपचारिक रूपमा सुरु गरिएको हो।

राति करिब ३ बजे बसेको सर्वदलीय तथा सर्वपक्षीय बैठकले मतगणनाको आचारसंहिता र प्रक्रियाबारे सहमति जुटाएपछि मतपेटिकाको सिल खोल्दै गणना थालिएको मुख्य निर्वाचन अधिकृत शिवप्रसाद खनालले जानकारी दिए।

यस निर्वाचन क्षेत्रमा नेकपा संयोजक तथा पूर्वप्रधानमन्त्री **पुष्पकमल दाहाल ‘प्रचण्ड’**सहित ११ जना उम्मेदवार प्रतिस्पर्धामा रहेका छन्। प्रचण्ड स्वयं चुनावी मैदानमा उत्रिएकाले रुकुमपूर्वको मतपरिणामलाई राष्ट्रिय राजनीतिमा विशेष चासोका साथ हेरिएको छ।

भौगोलिक रूपमा दुर्गम र उच्च हिमाली क्षेत्र भएकाले कतिपय मतदान केन्द्रबाट मतपेटिका ढुवानी गर्न चुनौती देखिएको थियो। तर सुरक्षा निकायको कडा स्कर्टिङमा रातभर ढुवानी गरेर सबै मतदान केन्द्रका मतपेटिका सदरमुकाममा सुरक्षित रूपमा ल्याइएको निर्वाचन कार्यालयले जनाएको छ।

निर्वाचन अधिकृत खनालका अनुसार सबै मतदान केन्द्रका मतपेटिका प्राप्त भएपछि राजनीतिक दलका प्रतिनिधिहरूसँगको समन्वयमा गणना सुरु गरिएको हो। अब क्रमशः मतगणना हुँदै परिणाम सार्वजनिक गरिने बताइएको छ।