काठमाडौं । भारतले नेपालमा सम्पन्न प्रतिनिधि सभा निर्वाचनमा जनताको उत्साहजनक सहभागिता देखिएको उल्लेख गर्दै निर्वाचन सफलतापूर्वक सम्पन्न भएकोमा स्वागत गरेको छ। साथै, उसले नेपालको नयाँ सरकारसँग सहकार्य गर्न उत्सुक रहेको सन्देश पनि दिएको छ।

नेपालमा सम्पन्न निर्वाचनबारे सञ्चारमाध्यमले सोधेका प्रश्नहरूको जवाफ दिँदै भारतको विदेश मन्त्रालयका प्रवक्ता रणधीर जैसवालले औपचारिक प्रतिक्रिया सार्वजनिक गरेका हुन्।

‘लोकतान्त्रिक जनादेशको प्रयोग’

विदेश मन्त्रालयद्वारा जारी वक्तव्यमा भनिएको छ, “आज नेपालका नागरिकहरूले आफ्नो लोकतान्त्रिक जनादेशको प्रयोग गर्दै उत्साहजनक सहभागितासहित निर्वाचन सफलतापूर्वक सम्पन्न गरेकोमा हामी स्वागत गर्दछौं।”

गत वर्षको असाधारण राजनीतिक परिस्थितिको पृष्ठभूमिमा निर्वाचन सम्पन्न भएको उल्लेख गर्दै भारतले प्रधानमन्त्री सुशीला कार्की, नेपाल सरकार, नेपाली जनता तथा सम्बन्धित सरोकारवालालाई बधाई दिएको छ।

सहयोग र आगामी सहकार्य

भारतले नेपालमा शान्ति, प्रगति र स्थिरताप्रति निरन्तर समर्थन रहेको दोहोर्‍याएको छ। निर्वाचनका लागि पूर्वप्रतिबद्धताअनुसार आवश्यक सवारीसाधन तथा सामग्री उपलब्ध गराइएको पनि वक्तव्यमा उल्लेख छ।

“हामी पारस्परिक हितका लागि हाम्रो दुई देश र जनताबीचका सुदृढ तथा बहुआयामिक सम्बन्धलाई अझ अघि बढाउन नेपालको नयाँ सरकारसँग सहकार्य गर्न उत्सुक छौं,” भारतीय पक्षले जनाएको छ।

नेपालको निर्वाचनप्रति छिमेकी राष्ट्रको औपचारिक प्रतिक्रिया आएसँगै अब नयाँ सरकार गठन र द्विपक्षीय सम्बन्धको आगामी दिशाबारे कूटनीतिक चासो बढ्ने देखिएको छ।