झापा । बालेन्द्र शाह ‘बालेन’ ले झापा जिल्ला–५ बाट प्रतिनिधि सभा सदस्य उम्मेदवारका रूपमा आफ्नो विस्तृत चुनावी वाचापत्र सार्वजनिक गरेका छन्। राष्ट्रिय स्वतन्त्र पार्टी (रास्वपा) को ‘वाचापत्र २०८२ : थिति बसाल्ने संकल्प’ कार्यान्वयनमा आफू अग्रसर रहने प्रतिबद्धता जनाउँदै उनले सुशासन, सेवा प्रवाह, विकास र पारदर्शितालाई प्राथमिकता दिने बताएका छन्।
उनका मुख्य ९ प्रतिबद्धताको विस्तृत रूप यसप्रकार छ:
१. ‘थिति बसाल्ने संकल्प’ कार्यान्वयनको नेतृत्व
बालेनले रास्वपाको राष्ट्रिय वाचापत्रलाई नीतिगत तहदेखि कार्यान्वयन तहसम्म प्रभावकारी रूपमा लागू गर्न पहल गर्ने बताएका छन्। संसद्मा विधेयक निर्माण, नीति बहस र संसदीय समितिमार्फत निगरानीलाई सक्रिय बनाउने उनको योजना छ।
२. आधारभूत अधिकारको व्यावहारिक कार्यान्वयन
नेपालको संविधानले सुनिश्चित गरेका गाँस, आवास, स्वास्थ्य, शिक्षा, खानेपानी, रोजगारी, सामाजिक सुरक्षा र स्वच्छ वातावरण जस्ता अधिकार व्यवहारमा कार्यान्वयन गर्न आवश्यक कानुन सुधार, बजेट विनियोजन र अनुगमन संयन्त्र बलियो बनाउने प्रतिबद्धता जनाइएको छ।
झापा–५ मा विशेष गरी—
- सुरक्षित खानेपानी विस्तार
- सामुदायिक स्वास्थ्य सेवा सुदृढीकरण
- सार्वजनिक विद्यालयको गुणस्तर सुधार
- युवामुखी सीप तथा रोजगारी कार्यक्रम लाई प्राथमिकतामा राखिने बताइएको छ।
३. राष्ट्रहित सर्वोपरि
राष्ट्रहित विपरीत हुने कुनै पनि अन्तर्राष्ट्रिय वा आन्तरिक सम्झौता नगर्ने अडान व्यक्त गरिएको छ। संसद्मा हुने सन्धि–सम्झौता र नीतिगत निर्णयमा पारदर्शिता र राष्ट्रिय स्वार्थको रक्षा गर्ने उनले बताएका छन्।
४. चुस्त सार्वजनिक सेवा
सरकारी कार्यालयमा हुने ढिलासुस्ती, भ्रष्टाचार र अनावश्यक झन्झट हटाउन कानुनी तथा संरचनात्मक सुधारमा पहल गर्ने प्रतिबद्धता छ। डिजिटल सेवा प्रवाह, समयबद्ध सेवा ग्यारेन्टी र नागरिक गुनासो सम्बोधन प्रणालीलाई प्रभावकारी बनाउने लक्ष्य राखिएको छ।
५. विकास र प्रकृति संरक्षण सँगसँगै
पूर्वाधार विकाससँगै वातावरणीय सन्तुलन जोगाउने नीति अवलम्बन गर्ने उल्लेख छ।
- हरित पूर्वाधार
- नदी तथा वन संरक्षण
- दिगो सहरीकरण
- जलवायु परिवर्तन अनुकूलन कार्यक्रम
लाई प्राथमिकता दिइने बताइएको छ।
६. झापा–५ मा संसद् सचिवालय स्थापना
स्थानीय नागरिकको गुनासो, सुझाव र सरोकार संसद्सम्म पुर्याउन झापा–५ भित्र व्यवस्थित संसद् सचिवालय स्थापना गर्ने योजना प्रस्तुत गरिएको छ। यसले स्थानीय मुद्दालाई प्रत्यक्ष रूपमा संघीय संसद्मा उठाउन सहयोग गर्ने विश्वास व्यक्त गरिएको छ।
७. राजनीतिलाई सेवा बनाउने
राजनीतिलाई पेशागत लाभको साधन होइन, सार्वजनिक सेवाको माध्यम बनाउने प्रतिबद्धता व्यक्त गरिएको छ। व्यक्तिगत लाभभन्दा सार्वजनिक हितलाई केन्द्रमा राखेर काम गर्ने उनको भनाइ छ।
८. मतको विश्वासलाई परिणाममा रूपान्तरण
निर्वाचनमा प्राप्त जनमतलाई केवल समर्थनका रूपमा नभई जिम्मेवारीका रूपमा लिने र स्पष्ट कार्ययोजना, समयसीमा तथा सार्वजनिक प्रतिवेदनमार्फत उपलब्धि देखाउने प्रतिबद्धता जनाइएको छ।
९. सेवा, इमानदारिता र परिणाममा आधारित राजनीति
आफ्नो राजनीतिक शैली पारदर्शी, उत्तरदायी र परिणाममुखी हुने दाबी गरिएको छ। नियमित सार्वजनिक संवाद, कार्यप्रगति प्रतिवेदन र नागरिकसँग प्रत्यक्ष सम्पर्कमार्फत जवाफदेहिता कायम गर्ने योजना छ।
बालेनको चुनावी प्रतिबद्वतामा केपी ओलीको परिकल्पनामा बनाईएको दमक भ्यु टावर (तर, जेनजीको नाममा भएको बिध्वंसमा काम छैन भनेर जलाईएको) को उच्चतम प्रयोग गर्ने पनि रहेछ भन्दै टिप्पणी शुरु भएको छ ।
बालेनको वाचापत्रले झापा–५ लाई नमूना निर्वाचन क्षेत्रका रूपमा विकास गर्ने, संघीय संसद्मा सक्रिय भूमिका खेल्ने र सुशासनको अभ्यास स्थापित गर्ने लक्ष्य प्रस्तुत गरेको छ। उनले “राजनीति परिवर्तनको साधन हो, सत्ताको सुविधा होइन” भन्ने सन्देशसहित मतदातासँग समर्थन मागेका छन्।
प्रतिक्रिया दिनुहोस्