रोल्पा, २ फागुन – रोल्पामा माघ २६ मा नेपाल प्रहरीले १०४ जना निर्वाचन प्रहरीमाथि कुटपिट गरेको घटना बाहिरिएको छ। केही प्रहरीलाई गम्भीर चोटपटक लागेको र १६ जनालाई उपचारका लागि रोल्पा अस्पताल रेउघामा भर्ना गरिएको स्रोतले जनाएको छ। अहिले सबै उपचारपछि डिस्चार्ज भइसकेका छन्।

अस्पताल स्रोतका अनुसार कुटिएका प्रहरीमध्ये धेरैको ढाड र तीघ्रामा नीलडाम देखिएको छ।

प्रत्यक्षदर्शीका अनुसार घटना बेलुका करिब ६ बजे रोल्पा नगरपालिका-४ लिबाङको शहीद प्रतिष्ठानको साततले भवनमा भएको हो। खाना खाएर फर्किँदै गरेका निर्वाचन प्रहरीलाई नेपाल प्रहरीले ‘हाँस्ने को–को हो ?’ भन्दै लाठी प्रहार गरेको प्रत्यक्षदर्शीले बताए।

जिल्ला प्रहरी कार्यालयले सुरुवातमा घटना गुपचुप राख्ने प्रयास गरेको थियो। तर, कुटपिटमा संलग्न प्रहरी कर्मचारीमाथि विभागीय कारबाही हुने आश्वासन दिइए पनि कार्यान्वयन नभएको आशंका भएपछि निर्वाचन प्रहरीले घटना बाहिर ल्याएका हुन्।

प्रमुख जिल्ला प्रहरी नायब उपरीक्षक (डीएसपी) वीरेन्द्रवीर विश्वकर्माले घटनालाई स्वीकार्दै भने, “खाना खाएर फर्कने क्रममा अपशब्द प्रयोग भएपछि निर्वाचन प्रहरीलाई अनुशासनमा राख्न प्रशिक्षकहरूले अलि कडाइ गरेको हो। एक-दुई लाठी प्रयोग गर्दा केही गुनासो आएको होला। विभागीय कारबाही पनि भइसकेको छ।”

प्रमुख जिल्ला अधिकारी गंगाबहादुर क्षेत्रीले पनि प्रहरी कर्मचारीलाई अनुशासनमा राख्न सतर्क गराइएको जानकारी दिएका छन्। उनले भने, “निर्वाचन प्रहरी सुरक्षाका लागि भर्ती गरिएको हो। उसले पनि अनुशासन र संस्थागत नियम मान्नुपर्छ।”

सामाजिक सञ्जालमा भने कतिपयले यस घटनालाई मानव अधिकार उल्लंघनको दृष्टिले हेरेका छन्।