काठमाडौं : उच्च पदस्थ व्यक्तिहरूलाई ज्यान मार्ने धम्की दिएको आरोपमा फिलिपिन्समा पक्राउ परेका प्रकाश पाठकलाई नेपाल प्रहरीले बुधबार बिहान काठमाडौं ल्याएको छ।

इन्टरपोल (अन्तर्राष्ट्रिय प्रहरी संगठन) र जिल्ला प्रहरी परिसर काठमाडौंको समन्वयमा उनलाई स्वदेश फिर्ता ल्याइएको हो। जिल्ला प्रहरी परिसरको टोली विशेष रूपमा फिलिपिन्स पुगेर पाठकलाई ल्याएको थियो।

परिसरका एसएसपी रमेश थापाले जानकारी दिएअनुसार, पाठकलाई हिरासतमा राखेर विद्युतीय कारोबार (साइबर) सम्बन्धी कसुर, आपराधिक लाभ, ठगी, आपराधिक विश्वासघात तथा अन्य अभियोगमा अनुसन्धान अघि बढाइएको छ।

पाठकले अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईसहित १० जना उच्च पदस्थ व्यक्तिहरूलाई पत्र र भिडियो सन्देशमार्फत ज्यान मार्ने धम्की दिएका थिए। उनले आफूलाई ‘एक्स्ट्रिमिस्ट ग्रुप अफ नेपाल’को अध्यक्ष भनेर परिचय दिँदै अख्तियार प्रमुख राईलाई १० दिनभित्र राजीनामा नदिए मार्ने चेतावनी दिएका थिए।

धम्कीको सूचीमा पूर्वप्रमुख आयुक्त लोकमानसिंह कार्की, नेपाल आयल निगमका पूर्वकार्यकारी निर्देशक गोपाल खड्का, पूर्वगृहमन्त्री रमेश लेखक, पूर्वआईजीपी ओमविक्रम राना, हेमबहादुर गुरुङ, रमेशचन्द ठकुरी, पूर्वपरराष्ट्रमन्त्री आरजु राणा देउवा, पूर्वगृहमन्त्री बालकृष्ण खाँण, मेडिकल व्यवसायी दुर्गा प्रसाईं लगायतका नाम समावेश थिए।

काभ्रे जिल्लाको तेमाल गाउँपालिका–१ घर भएका ३३ वर्षीय पाठक फिलिपिन्सको मालोलोस सहरबाट पक्राउ परेका थिए। फिलिपिन्सको ब्यूरो अफ इमिग्रेशन (बीआई) ले डिसेम्बर ३१, २०२५ मा उनलाई नियन्त्रणमा लिएको थियो।

पाठकविरुद्ध काठमाडौं जिल्ला अदालतबाट पक्राउ पुर्जी जारी भएको थियो भने इन्टरपोलबाट ‘डिफ्युजन नोटिस’ (Diffusion Notice) जारी गरिएको थियो। नेपाल प्रहरीको अनुरोधमा फिलिपिन्स प्रहरीले उनलाई पक्राउ गरेको बीआईले विज्ञप्तिमार्फत जनाएको थियो।

पाठक पहिलेदेखि नै विभिन्न कसुरमा पटक-पटक मुद्दा परेको व्यक्ति रहेको खुलेको छ। प्रहरीको क्रिमिनल रेकर्ड सिस्टम (सीआरएस) जाँच गर्दा उनमाथि चारवटा फरक-फरक मुद्दा चलेको पाइएको छ। तीमध्ये सार्वजनिक अपराध (अभद्र व्यवहार), ठगी, आपराधिक विश्वासघात र आपराधिक लाभसम्बन्धी अभियोग छन्।

यसअघि उनी ६५ लाख रुपैयाँ ठगीको फरार अभियुक्त समेत रहेको अनुसन्धानबाट खुलेको छ।

अब जिल्ला प्रहरी परिसर काठमाडौंले उनलाई हिरासतमा राखेर थप अनुसन्धान तथा आवश्यक कारबाही अघि बढाउने जनाएको छ। यो घटनाले उच्च पदस्थ व्यक्तिमाथि धम्की र साइबर अपराधको विषयलाई फेरि चर्चामा ल्याएको छ।