राजविराज, २७ माघ |

राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह मंगलबार सप्तरीको राजविराज आउँदा समर्थक र नेता–कार्यकर्तालाई गाडीभित्रैबाट हात हल्लाउँदै फर्किएका छन् । आगामी फागुन २१ मा हुने प्रतिनिधिसभा निर्वाचनलाई लक्षित गरी राजविराज आएका शाह एकपटक पनि गाडीबाट ओर्लिएनन् ।

एकाबिहानैदेखि उनको प्रतीक्षामा बसेका पार्टी नेता–कार्यकर्ता र समर्थक गाडीबाट नओर्लिएको दृश्य हेरेरै बस्न बाध्य भए । गजेन्द्र चोक पुग्दा उनले स्वर्गीय नेता गजेन्द्रनारायण सिंह (गजेन्द्र बाबु) को सालिकमा गाडीभित्रैबाट माला फ्याँकेर अघि बढेपछि उपस्थितहरू आश्चर्य र असन्तुष्टिमा परेका थिए ।

गजेन्द्र बाबुको सालिकमा विधिवत् माल्यार्पण गरी त्यसैको छेउमा रहेको पार्टी कार्यालय पुग्ने कार्यक्रम तय भए पनि शाहले पार्टी कार्यालय अगाडि गाडी रोकेनन् । यसपछि समर्थक र नेता–कार्यकर्ता निराश देखिएका थिए ।

राजविराजकै एक होटलमा खाना खाइरहेका बेला पुनः फर्किएर पार्टी कार्यालय तथा सालिकमा माल्यार्पण गर्ने विश्वासमा एक घण्टाभन्दा बढी समय समर्थकहरू त्यहीँ पर्खिए । तर खाना सकेपछि शाह हुलाकी सडक हुँदै पश्चिमतर्फ लागेपछि प्रतीक्षामा रहेका नेता–कार्यकर्ता र समर्थक निराश हुँदै फर्किएका छन् ।

स्थानीय नेता–कार्यकर्ताहरूले यस घटनाले चुनावी माहोलमा नकारात्मक सन्देश गएको प्रतिक्रिया दिएका छन् । “मतदाता र कार्यकर्तासँग प्रत्यक्ष संवाद नगरी यसरी फर्किनु राजनीतिक हिसाबले गलत सन्देश हो,” एक स्थानीय नेताले बताए ।