काठमाडौं, २७ माघ । रामेछापमा भएको बस दुर्घटनामा मृत्यु हुनेको संख्या ६ पुगेको छ। दुर्घटनामा ५ जनाभन्दा धेरै घाइते भएका छन्।

मंगलबार बिहान काठमाडौँबाट ओखलढुंगाको लागि छुटेका प्रदेश ३–०१–००५ ख ९९७५ नम्बरको बस रामेछाप जिल्लाको मन्थली नगरपालिका–६ त्रिवेणी घाट नजिकबाट तामाकोसी नदिमा खसेको हो।

सशस्त्र प्रहरीका सहप्रवक्ता शैलेन्द्र थापाले दिएको जानकारीअनुसार दुर्घटनमा परी ६ जनाको घटनास्थलमै मृत्यु भएको छ भने ५ जना यात्रीको घाइते अवस्थामा उद्धार गरिएको छ। मंगलबार बिहान करिब पौने ११ बजे बस सडकबाट झण्डै २० मिटर तल तामाकोसी नदिमा खसेर दुर्घटना भएको हो।

बस पूरै नदीमा डुबेको छ।दुर्घटना लगत्तै सशस्त्र प्रहरी बल नेपाल गुल्म रामेछाप र विपद् व्यवस्थाप बेश खुर्कोटबाट गोताखोरसहितको सुरक्षा फौज र नेपाल प्रहरीको संयुक्त टोली उद्धार कार्यमा खटिएको छ। दुर्घटनामा परी मृत्यु हुनेमा २ जना पुरुष र ४ जना महिला रहेका छन्।

उनीहरूको नाम खुलिसकेको छैन। घटनास्थलबाट उद्धार गरिएका ५ जनालाई उपचारको लागि जिल्ला अस्पताल खुर्कोटतर्फ पठाइएको थापाले बताए। बसमा कतिजना सवार थिए, खुल्न बाँकी छ। बस नदीमा डुबेको छ। उद्दार कार्य अहिले पनि जारी रहेको डीएसपी थापाले बताए।