अमेरिकी राष्ट्रपति डोनाल्ड ट्रम्पले रुस र युक्रेनसँग संयुक्त राज्य अमेरिकाले अत्यन्तै राम्रो वार्ता गरिरहेको बताउनुभएको छ । लगभग चार वर्ष पुग्न लागेको यस द्वन्द्वको समाधानका लागि उहाँले केही हुनसक्ने अपेक्षा व्यक्त गर्नुभयो । अमेरिकाको रुस र युक्रेनसँग निकै राम्रो कुराकानी भइरहेको बताउँदै उहाँले केही हुनसक्ने बताउनु भयो । राष्ट्रपतिले यस बारेमा थप विस्तृत विवरण भने दिनुभएन । संयुक्त राज्य अमेरिकाको मध्यस्थतामा रुस र युक्रेनबीच भएको दोस्रो चरणको वार्ता बिहीवार अबु धाबीमा सम्पन्न भएको छ । दुवै पक्ष ठूलो संख्यामा बन्दीहरू साटासाट गर्न सहमत भएपनि क्षेत्रीय व्यवस्था जस्ता मुख्य विषयहरूमा भने कुनै ठोस सहमति जुट्न सकेन । युक्रेनी राष्ट्रपति भोलोडिमिर जेलेन्स्कीले बिहीवार अर्को शान्ति वार्ता निकट भविष्यमा, सम्भवतः संयुक्त राज्य अमेरिकामा आयोजना गरिने बताउनुभयो ।