काठमाडौँ,१९ माघ । भदौ २३ र २४ को जेन-जी आन्दोलनका क्रममा ज्यान गुमाएका सहिदहरूको आत्माको शान्तिको कामना गर्दै नयाँ बानेश्वरस्थित संसद् भवन अगाडि ‘नेत्रवाद दर्शन’ समूहले हवन सम्पन्न गरेको छ।

एक महिनादेखि माइतीघर मण्डलामा आन्दोलनरत समूहले आइतबारदेखि संसद् भवनको मुख्य गेट अगाडि होम–यज्ञ तथा पूजा सुरु गरेको हो। आयोजकहरूले जनाए अनुसार, यो हवन केवल धार्मिक अनुष्ठान मात्र नभई आन्दोलनका क्रममा हराएका सहिदहरूको सम्झना र उनीहरूको सपना पूरा गर्ने सांकेतिक कदम पनि हो।

समूहकी अभियन्ता स्मृति राईका अनुसार, “हामीले जेन-जीको न्याय र समस्या समाधानका लागि यो कदम चालेका हौँ। पूजा केवल धार्मिक विधि मात्र नभई वर्तमान राजनीतिक र संवैधानिक समस्याहरूको समाधानका लागि गरिएको सांकेतिक विरोध पनि हो।”

आन्दोलनमा ज्यान गुमाएका सहिदहरूको सम्झना गर्न र उनीहरूको योगदानलाई स्मरण गर्न आयोजित यस हवन कार्यक्रममा विभिन्न सामाजिक तथा मानवअधिकारकर्मीहरू उपस्थित थिए। आयोजकहरूको भनाइमा, यस्तो कार्यक्रमले न केवल सहिदहरूको सम्मान गर्ने तर युवा पुस्तालाई उनीहरूको अधिकार र राजनीतिक चेतना प्रति जागरूक गर्ने उद्देश्य राखेको छ।