बुटवल : संविधानले राज्यका हरेक निकायमा ३३ प्रतिशत महिला सहभागिता सुनिश्चित गरेको छ, तर आगामी फागुन २१ गते हुने प्रतिनिधिसभा निर्वाचनमा लुम्बिनी प्रदेशका २६ निर्वाचन क्षेत्रमा प्रमुख दलहरूले महिलालाई प्रत्यक्षतर्फ निकै कम टिकट दिएका छन्। कुल ५९९ उम्मेदवारमध्ये महिला मात्र ५६ जना (९.३५ प्रतिशत) छन्।
नेकपा (एमाले), नेपाली कांग्रेस र नेकपा (माओवादी केन्द्र) ले लाज ढाक्नका लागि १/१ जना महिला उम्मेदवार बनाएका छन् भने ‘जान्नेलाई छान्ने’ नारा लिएको राष्ट्रिय स्वतन्त्र पार्टी (रास्वपा) ले प्रदेशभर एक जना पनि महिला उम्मेदवार उठाएको छैन।
प्रमुख दलहरूको महिला उम्मेदवार स्थिति
- नेपाली कांग्रेस: रुकुम पूर्वबाट कुसुमदेवी थापा (केन्द्रीय सदस्य, पूर्व समानुपातिक सांसद)। थापा पूर्व प्रधानमन्त्री पुष्पकमल दाहाल ‘प्रचण्ड’ सँग प्रतिस्पर्धामा छन्। यो क्षेत्रमा महिलालाई ‘सजिलो’का लागि मात्र टिकट दिइएको हो कि भन्ने प्रश्न उठेको छ।
- नेकपा (एमाले): बर्दिया–२ बाट विमला विक (पूर्व सांसद, समानुपातिकबाट)। विकलाई पहिलो पटक प्रत्यक्षतर्फ टिकट दिइएको छ, जुन सकारात्मक भए पनि दलको समग्र चरित्रमा प्रश्न उठेको छ।
- नेकपा नवलपरासी (बर्दघाट सुस्ता पश्चिम)–१ बाट सिन्धु जलेसा बुढाथोकी। उनी २०७९ मा एमालेतर्फबाट उम्मेदवार बनेकी थिइन् तर अन्तिम समयमा फिर्ता भएकी थिइन्।
- रास्वपा (राष्ट्रिय स्वतन्त्र पार्टी): लुम्बिनी प्रदेशका २६ क्षेत्रमा शून्य महिला उम्मेदवार। पार्टीले ‘जान्नेलाई छान्ने’ नारा लिए पनि महिलालाई प्रत्यक्षतर्फ अवसर नदिएकोमा आलोचना भएको छ।
अन्य उल्लेखनीय महिला उम्मेदवार
- बाँके–१ बाट कृष्णा केसी (प्रगतिशील लोकतान्त्रिक पार्टी – प्रलोपा)। उनी पूर्व माओवादी केन्द्रकी प्रदेश सांसद थिइन्, टिकट नपाएपछि दल परित्याग गरी चुनावी मैदानमा उत्रिएकी छन्।
लुम्बिनी प्रदेशमा प्रमुख दलहरूले संविधानको ३३ प्रतिशत महिला सहभागिताको मर्मलाई प्रत्यक्ष निर्वाचनमा लागू गर्न असफल देखिएका छन्। रास्वपाको शून्य उपस्थिति विशेष रूपमा आलोचनाको विषय बनेको छ। अधिकारकर्मीहरूका अनुसार, जबसम्म दलहरूले महिलालाई प्रत्यक्षमा अवसर दिँदैनन्, तबसम्म लैङ्गिक समानता र समावेशी विकासको कुरा खोक्रो रहनेछ।
प्रतिक्रिया दिनुहोस्