काठमाडौं ३० पुस: थाइल्याण्डको उत्तर–पूर्वी क्षेत्रमा यात्रुवाहक रेलमा निर्माणाधीन क्रेन खस्दा कम्तीमा २२ जनाको मृत्यु भएको छ भने ५५ जना घाइते भएका छन्।

समाचार संस्था अलजजिराका अनुसार, बैंककबाट उबोन रत्चाथानीतर्फ जाँदै गरेको रेल नाखोन रत्चासिमा प्रान्तको सिखियो जिल्लामा दुर्घटनाग्रस्त भएको हो। उच्च गतिको रेल मार्ग निर्माण भइरहेका बेला माथि काम गरिरहेको क्रेन भत्किएर तल गुडिरहेको रेलमाथि खसेको थियो।

क्रेनको ठक्करपछि रेल लिकबाट बाहिरिएको थियो र त्यसलगत्तै केही डब्बामा आगलागी भएको थियो। स्थानीय प्रहरीले आगो नियन्त्रणमा लिइसकिएको जनाएको छ।

प्रहरीका अनुसार, प्रारम्भिक विवरणमा मृतकको संख्या ४ भनिए पनि उद्धार कार्यसँगै संख्या बढ्दै २२ पुगेको छ। मृतक संख्या अझै बढ्न सक्ने अनुमान गरिएको छ।

हाल घटनास्थलमा उद्धार कार्य जारी छ। घाइतेहरूलाई नजिकका अस्पतालमा उपचारका लागि पठाइएको छ। दुर्घटनाको कारणबारे अनुसन्धान सुरु गरिएको थाई प्रहरीले जनाएको छ।