भक्तपुर, – मध्यपुर थिमि नगरपालिका वडा नं. ३ स्थित समस्याग्रस्त कृषि विकास बचत तथा ऋण सहकारी संस्था लि. सम्बन्धमा नगर कार्यपालिकाले अति जरुरी सूचना प्रकाशित गरेको छ। सहकारी संस्थाबाट ऋण लिनु भएका व्यक्तिहरू र कम्पनीहरूले आफ्नो ऋण दायित्व राफसाफ गर्न तत्काल समिति कार्यालयमा सम्पर्क गर्नुपर्ने भनिएको छ।

नगर कार्यपालिकाले जारी गरेको सूचनामा भनिएको छ कि उक्त सहकारी संस्थाबाट कर्जा लिनु भएका ऋणीहरूले आफ्नो कर्जा/ऋण र तदनुसारका व्याज वा हर्जाना अझै भुक्तानी नगरेको छ। समितिको हालसम्मको सूक्ष्म अध्ययन र छानबिन अनुसन्धान अनुसार, ऋणीहरूसँगै सहकारीका तत्कालीन व्यवस्थापक, पदाधिकारी र कर्मचारीहरू पनि कानूनी दायित्वबाट मुक्त हुन सक्ने अवस्था छैन।

समितिले सबै ऋणीहरूलाई आह्वान गर्दै भनेको छ कि आफ्नो वा आफ्नो कम्पनीको नाममा लिएको सबै कर्जा/ऋणको दायित्व अवश्य राफसाफ गर्नुहोस्। साथै, तत्कालीन समयमा सहकारीमा कार्यरत वा बहाल रहेका पदाधिकारी, व्यवस्थापक र कर्मचारीहरूले पनि यस सम्बन्धमा समितिसँग सम्पर्क गरी आवश्यक जानकारी दिनु अनिवार्य रहेको छ।

सूचना प्रकाशित मितिबाट १५ दिनभित्र कार्यालय खुलेको समयमा फोन सम्पर्क गरी उपस्थित हुनुपर्ने उल्लेख गरिएको छ। समयमै अनुपालन नगरेमा प्रचलित कानूनअनुसार कारबाही अगाडि बढाइने चेतावनी पनि जारी गरिएको छ।