काठमाडौं ५ असोज । जेनजी आन्दोलनले खडा गरिदिएको चुनौतीका बारेमा छलफल गर्न बोलाइएको नेकपा माओवादी केन्द्रकाको आकस्मिक पदाधिकारी बठैकमा अध्यक्ष पुष्पकमल दाहाल प्रचण्डले पार्टीका सबै संरचना विघटन गर्नु पर्ने अवस्था आएको बताएका छन् । उनले वैठकमा आगामी फागुनमा तय भएको प्रतिनिधि सभाको चुनावअगाडि पार्टीको महाधिवेशन गर्ने प्रस्ताव अघि गरेको बताइएको छ ।

देशको वर्तमान अवस्था, पछिल्ला राजनीतिक घटनाक्रमको विकास र माओवादी पार्टीले लिने कदमबारे झण्डै एक घण्टा बढी बोल्दै प्रचण्डले पार्टीका सबै समिति भंग गरेर महाधिवेशन आयोजक समिति बनाउने प्रस्ताव गरेका छन् । एक पदाधिकारीका अनुसार आयोजक समितिको संयोजक मात्र बनाउने र अहिले भएका केन्द्रीय, स्थायी र पदाधिकारी सबै खारेज गर्ने, त्यसका लागि अबको एकहप्ताभित्र आकस्मिक केन्द्रीय समितिको बैठक गर्ने प्रचण्डको प्रस्ताव छ ।
जेनजीले भदौ २३ गते देशका केही जिल्लामा प्रदर्शन गरेका थिए। तर, सो शान्तिपूर्ण प्रदर्शन हिंसात्मक बन्न पुगेपछि प्रहरीले गोली चलाएको थियो। जसमा परेर २१ जना युवाको ज्यान गयो। आक्रोशित युवाले भदौ २४ गते देशभर प्रदर्शन गरेपछि प्रधानमन्त्री केपी शर्मा ओलीले सरकार छाडेको थिए। जेनजी आन्दोलनका क्रममा ७४ भन्दा बढी व्यक्तिको मृत्यु भएको गृहमन्त्रालयले जनाएको छ ।

चुनाव नभए संसद व्युँतने समेत प्रचण्डले विश्लेषण गरेको बताइएको छ । ‘६ महिनामा चुनाव भएन भने स्वतः यो संसद् व्युतन्छ। त्यतिखेर संसदले नयाँ सरकार बनाउनुपर्छ, के गर्ने त्यही बेला रणनीति तय गरौँला,’ प्रचण्डले बैठकमा बताएको एक पदाधिकारीले बताए ।