काठमाडौ १९ साउन । बाग्मती प्रदेशका मुख्यमन्त्री बहादुरसिंह लामाले हिजो पदबाट राजीनाको घोषणा गर्नुभएको छ । हेटौँडामा रहेको मुख्यमन्त्री तथा मन्त्रिपरिषद्को कार्यालयमा पत्रकार सम्मेलन गरी उहाँले राजीनामा घोषणा गर्नुभयो ।

पत्रकार सम्मेलनलगत्तै राजीनामा बुझाउन प्रदेश प्रमुखको कार्यालयमा पुगे पनि प्रदेश प्रमुख दीपकप्रसाद देवकोटा त्यहाँ नरहेकाले लामा फर्किनुभएको थियो । प्रदेश प्रमुख देवकोटा आएपछि आज उहाँलाई राजीनामा पत्र बुझाउने मुख्यमन्त्री लामाले जानकारी दिनुभयो ।

गएको साउन १४ गते भएको पार्टी संसदीय दलको नेतामा पराजित भएपछि पार्टी सभापति शेरबहादुर देउवाको निर्देशनमा मुख्यमन्त्री लामाले पदबाट राजीनामा दिनुभएको हो । उहाँले संसदीय दलको नेतामा निर्वाचित इन्द्रबहादुर बानियाँको नेतृत्वमा सहमति र सहकार्य गरेर अगाडि बढ्ने प्रतिबद्धता पनि व्यक्त गर्नुभयो ।

आफूले इमान्दारितापूर्वक काम गरे पनि प्रदेश सरकार अचानक ढाल्ने अवस्थाले स्थिरता र स्थायित्वको प्रतिबद्धतामाथि प्रश्न उठेको मुख्यमन्त्री लामाको भनाइ छ ।