काठमाडौ १५ साउन । गाजाको भविष्यको बारेमा अमेरिकी राष्ट्रपति डोनाल्ड ट्रम्पको प्रशासनसँग स्पष्ट दीर्घकालीन योजना नभएको भन्दै अमेरिका निकटका सहयोगी राष्ट्रहरू कूटनीतिक रूपमा टाढिँदै छन् ।

क्यानडा, फ्रान्स र बेलायतले शर्तसहित प्यालेस्टाइनलाई स्वतन्त्र देशको मान्यता दिने घोषणा गरेपछि अमेरिकी प्रशासनले यो विषय बहिष्कार गरेको बीबीसीले जनाएको छ ।

फ्रान्स र साउदी अरेबियाको नेतृत्वमा अमेरकाको न्यूयोर्कमा सम्पन्न संयुक्त राष्ट्रसङ्घीय सम्मेलनमा सहभागी युरोपेली र अरब देशहरूले दुई–राष्ट्र समाधानको पक्षमा नयाँ पहल गरेका छन् । तर ट्रम्प प्रशासनले यसलाई प्रचारको नाटक भएको बताउनुभयो ।

पूर्वअमेरिकी विदेशमन्त्री एन्टोनी ब्लिन्कनले सन् २०२३ नोभेम्बरमा जापानको टोकियोमा गाजा युद्धपछिको भविष्यका लागि केही सिद्धान्तहरू प्रस्ताव गर्नुभएको थियो । जबरजस्ती स्थानान्तरण नगर्ने, इजरायली पुनः अधिनायक नबनाउने, गाजामाथि नाकाबन्दी नलगाउने, प्यालेस्टिनी प्राधिकरणको संलग्नता रहने र हमासको भूमिका नहुनेजस्ता बुँदाहरू छन् ।

ट्रम्प प्रशासनको पछिल्लो नीति इजरायल सरकारसँग झन् मिल्दोजुल्दो देखिन थालेको छ । इजरायली प्रधानमन्त्री बेन्जामिन नेतन्याहूले गाजाको भविष्यमा प्यालेस्टिनी अधिकार अस्वीकार गर्नुभएको छ ।

इजरायलका चरम दक्षिणपन्थी नेताहरूले स्थायी सैन्य अधिनायक, प्यालेस्टिनीहरूको निष्कासन र यहूदी बस्ती विस्तारको मागसमेत गरेका छन् ।